रवि लामिछानेविरुद्ध राहदानीसम्बन्धी उजुरी दर्ता गर्न प्रहरीद्वारा अस्वीकार

१७ माघ, काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध राहदानीमाथि अनुसन्धान गर्न जाहेरी दरखास्त दर्ता गर्न काठमाडौं प्रहरी परिसरले अस्वीकार गरेको छ ।

निष्क्रिय भएको नागरिकताका आधारमा राहदानी लिएर अधिकार दुरपयोग गरेको भन्दै युवराज पौडेल ‘सफल’ जाहेरी लिएर काठमाडौं प्रहरी परिसर पुगेका थिए ।

लामिछानेको नागरिकतासम्बन्धी विवादमा सर्वोच्च अदालतले संक्षिप्त फैसला दिइसकेको र फैसलाको पूर्णपाठ नआइसकेकाे जनाउँदै जाहेरी दर्ता नगरिएको हो ।

लामिछानेले अमेरिकी नागरिक रहेकै बेला नेपाल आएर बस्दा नेपालको पुरानो नागरिकता प्रयोग गरेर १२ जेठ २०७२ मा नेपाली पासपोर्ट लिएका थिए । सर्वोच्च अदालतले शुक्रबारको फैसलामा उक्त नागरिकता २०७० मै खारेज भइसकेको संक्षिप्त फैसालामा उल्लेख थियो । सोही आधारमा उनको सांसद र गृहमन्त्री पद गुमेको हो ।

सफलले भने लामिछानेले झुटो विवरण दिई राहदानी लिएकाले तत्काल पक्राउ गरी आवश्यक अनुसन्धान गरी कानुन बमोजिम मुद्दा चलाउनुपर्ने माग गर्दै आएका छन् । सर्वोच्चमा नागरिकतासम्बन्धी मुद्दा दर्तामा पनि पौडेल सहभागी थिए ।