रास्वपाका सभापति लामिछानेबिरुद्ध अध्यागमनमा पर्यो उजुरी

१७ माघ, काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेबिरुद्ध अध्यागमन विभागमा उजुरी दर्ता भएको छ । उनीबिरुद्ध विदेशी नागरिक रहेकै अवस्थामा नेपाली नागरिकको रुपमा नेपाली पासपोर्ट लिएको भन्दै उजुरी परेको हो । अध्यागमन ऐन अनुसार कारवाहीको माग गर्दै मंगलबार युवराज पौडेलले नेता लामिछानेविरुद्ध उजुरी दिएको विभागले जनाएको छ ।

अध्यागमन विभागका महानिर्देशलाई सम्बोधन गर्दै दिइएको उजुरीमा लामिछानले आफू अमेरिकी नागरिक भएको बखतमा केवल नेपाली नागरिकले मात्रै प्राप्त गर्नसक्ने नेपाली राहादनी प्राप्त गर्ने जुन कार्य गरेका छन् सो कानुनद्वारा बर्जित र दण्डनीय छ भनिएको छ । उक्त कार्य अध्यागमन ऐनको दफा ५ विपरीत भई दफा १० अन्तर्गत दण्डनीय भएको हुँदा सो ऐनको दफा ८ बमोजिम तत्कालै छानबिन र कारबाही प्रक्रिया अघि बढाउन भनिएको छ ।

पौडेलले दिएको उजुरीमा सर्वोच्च अदालतको संवैधानिक इजलासबाट माघ १३ गतेको फैसला अनुसार लामिछानेमाथि छानबिन गर्ने सम्बन्धमा सम्बन्धित निकायले कसरी छानबिन गरिरहेको छ भन्दै त्यसबारे उजुरीमार्फत् जिज्ञासा राखिएको छ । उजुरीकर्ता पौडेलले नेता लामिछानेले विगतमा प्रयोग गरेका नेपाली र अमेरिकी नागरिकता र राहदानीको प्रतिलिपि समेत पेस गरेको विभागले जनाएको छ ।

उजुरीकर्ता पौडेल र अधिवक्ता रविराज बसौलाको उजुरीकै आधारमा गत माघ १३ गते सर्वोच्च अदालतको संवैधानिक इजलासले रवि लामिछानेको नागरिकता कायम नरहेको ठहर गर्दै सांसद पद खारेज गरिदिएको थियो । उनले नेपाल नागरिकता पुनःप्राप्तिको प्रक्रिया पूरा नगरेको भन्दै उनी सांसद बन्न अयोग्य रहेको ठहर गरेको थियो । त्यसपछि माघ १५ गते नेता लामिछानेले काठमाडौं जिल्ला प्रशासन कार्यालयमा पुगेर प्रक्रिया पूरा गरी नागरिकता पुनः प्राप्त गरेका थिए ।