पौडेलको भनाइले राजनीतिमा तरंग, देउवा र प्रचण्डलाई पर्यो आपत !

१७ माघ, काठमाडौं । नेपाली कांग्रेसका नेता रामचन्द्र पौडेलको सत्ता गठबन्धन फुटाउन प्रयास भइरहेको भन्ने भनाइले राजनीतिमा नयाँ तरंग सिर्जना गरेको छ । उनको भनाइका कारण कांग्रेस सभापति शेरबहादुर देउवा र नेकपा माओवादीका अध्यक्ष एवं प्रधानमन्त्री पुष्पकमल दाहाल प्रचण्ड संकटमा परेका छन् । कतिपय कांग्रेस नेताहरुले पौडेलको भनाई नितान्त व्यक्तिगत भएको बताएका छन ।

नेता पौडेलले मंगलबार सार्वजनिक मञ्चबाटै प्रधानमन्त्री पुष्पकमल दाहाल ‘प्रचण्ड’लाई नेकपा एमाले नेतृत्वको गठबन्धनबाट फुटाएर फेरी कांग्रेसमा ल्याउन प्रयास भइरहेको भनाई राखेपछि राजनीतिमा तरंग उत्पन्न भएको हो । उनको यो भनाइले सत्ता गठबन्धनमा थप अविश्वास बढेको छ भने प्रधानमन्त्री प्रचण्डले सत्ता सहयात्री दलहरुलाई जवाफ दिनुपर्ने अवस्था ल्याएको छ ।

पौडेलको भनाइले कांग्रेस सभापति देउवा र प्रधानमन्त्री प्रचण्ड दुवै समस्यामा देखिएका छन् । दुई नेताबीच आन्तरिक रुपमा जे जस्ता सहमति भएपनि सभापति देउवाले कांग्रेसले कुनै स्वार्थ नराखि सरकारलाई विश्वासको मत दिएको बताउँदै आएका थिए । नेता पौडेलले एमाले नेतृत्वको गठबन्धनबाट टुटाएर माओवादी केन्द्रका अध्यक्ष प्रचण्डलाई कांग्रेसतिर ल्याउने कोसिस भइरहेको भनाई राखेपछि राष्ट्रपतिका विषयमा प्रधानमन्त्री प्रचण्ड र उनको दलप्रति विस्वस्त हुन नसकेका एमाले अध्यक्ष केपी शर्मा ओलीलाई थप सशंकित बनाएको छ ।

शहीद सप्ताहको अवसरमा कांग्रेस तनहुँले मंगलबार दमौलीमा गरेको वर्तमान अवस्थामा नेपाली कांग्रेसको भूमिका विषयक अन्तरक्रियामा नेता पौडेलले प्रचण्डलाई एमालेसँगको गठबन्धन टुटाएर आफूतिर ल्याउन कांग्रेसले जोड गरिरहेको भनाई राखेका हुन् । उनले अहिले कांग्रेसको मुख्य ध्यान राष्ट्रपति प्राप्ति भएको भन्दै अहिले कांग्रेसको प्रयास सत्ता गठबन्धनबाट प्रचण्डलाई अलग गर्नु रहेको बताए । गृह मन्त्रालयलाई लिएर गठबन्धन यतिबेला तनावमा छ ।

प्रधानमन्त्री प्रचण्डले विभिन्न कानुनी समस्या देखाउँदै रास्वपालाई गृह मन्त्रालय दिन नसकिने भनेपछि उसले सरकारलाई दिएको समर्थन फिर्ता लिने अडकल गरिएको छ । फागुन २५ मा राष्ट्रपति निर्वाचनको मिति पनि तय भइसकेको छ । यसै विषयलाई लिएर अप्ठ्यारो पर्ने अवस्था आएमा प्रधानमन्त्रीले कांग्रेसले हतार गरेका कारण राष्ट्रपतिको विषयमा राष्ट्रिय सहमति जुट्न नसकेको भन्ने सम्भावना बढेको नेताहरुको बुझाइ छ । एमालेले सत्ता गठबन्धनभित्रको सहमतिअनुसार आफ्नो दलले राष्ट्रपति पाउने बताउँदै आएको छ ।