कार्यविभाजन नमिल्दा माओवादीको स्थायी कमिटी बैठक स्थगित

१८ माघ, काठमाडौं । नेताहरुको कार्यविभाजनमा सहमति जुटाउन कठिन हुने देखिएपछि नेकपा माओवादी केन्द्रको स्थायी कमिटी बैठक फेरी स्थगित भएको छ । नेताहरुको कार्यविभाजन मिलाएर बैठक बस्ने भन्दै लगातार मिति सर्दै आएको थियो । स्थायी कमिटी स्थगित गर्दै माओवादीले पोलिटव्युरोमा छलफल गर्दै आएको थियो ।

पार्टी केन्द्रीय कार्यालय पेरिसडाँडामा आजका लागि बोलाइएको बैठक स्थगित भएको एक नेताले जानकारी दिए । मंगलबारका लागि बोलाइएको बैठक पार्टीको संगठनसम्बन्धी कार्यविभाजनको काम नसकिएकाले आजका लागि सारिएको थियो । बैठक भोलि बिहान ११ बजे बस्ने उनले बताए । पार्टी अध्यक्ष तथा प्रधानमन्त्री पुष्पकमल दाहाल प्रचण्डको कार्यव्यस्तताका कारण बैठक पनि स्थगित गर्नु परेको माओवादी केन्द्रले जनाएको छ ।

यसअघि बसेको बैठकले संगठन सुदृढीकरणमा तीन महिने अभियान चलाउने तथा ३० भन्दा बढी बिभागलाई पुर्णता दिने भनेको थियो । सोही अनुसार स्थायी कमिटी सदस्य र पोलिटब्युरो सदस्यलाई बिभिन्न बिभागको जिम्मेवारी दिने तयारी थियो । तर, कुन नेतालाई कुन जिम्मेवारी दिने भन्ने विषयमा सहमति हुनसकेको छैन् ।