लामिछाने सांसद नरहेको जानकारी दिन सभामुखले बोलाए बैठक

१८ माघ, काठमाडौं । कुनै ठोस विषयबस्तु नभएपछि सभामुख देवराज घिमिरेले सामान्य कार्यसूची राखेर प्रतिनिसिभाको बैठक बोलाएका छन् । बुधबार दिउँसो १ बजे बोलाइएको बैठकमा छलफलका लागि खास एजेण्डा भने छैनन् । सरकारले कुनै विषय दिन नसक्दा प्रतिनिधिसभा विजनेसबिहीन भएको छ । अघिल्लो संसदले निर्णय दिन नसकेका दर्जन बढी विधेयहरु छन् । तर, पेस भएका छैनन् ।

सभामुख घिमिरेले दिउँसो १ बजे बोलाएको प्रतिनिधिसभा बैठकमा राष्ट्रपतिको कार्यालयबाट प्राप्त कार्यभार तोकिएको सम्बन्धी पत्रको व्यहोरा पढेर सुनाउने पहिलो कार्यसूची छ । प्रधानमन्त्री पुष्पकमल दाहाल प्रचण्डले राष्ट्रिय मानव अधिकार आयोगको २२ औं वार्षिक प्रतिवेदन पनि पेस गर्ने सम्भावित कार्यसूची रहेको छ । यो पेस भएमा यसमाथि समान्य छलफल हुनेछ ।

संसद् सचिवालयका अनुसार बैठकमा सभामुखले नेपालको संविधानको धारा ८९ को खण्ड (ख) बमोजिम प्रतिनिधि सभा सदस्यको स्थान एक रिक्त रहेको जानकारी प्रतिनिधि सभा नियमावली, २०७५ को नियम २१२ को (१) बमोजिम गराउने सम्भावित कार्यसूची रहेको छ । राष्ट्रिय स्वतन्त्र पार्टीका सांसद रवि लामिछानेको सांसद पद खारेज भएको छ ।

सभामुखले सर्वोच्च अदालतले राष्ट्रिय स्वतन्त्र पार्टीका सभापति रवि लामिछानेको सांसद पद खारेज गरिदिएपछि त्यो पद रिक्त भएको संसदलाई जानकारी गराउन आज बैठक राखेका हुन् । सर्वोच्च अदालतले अमेरिकी नागरितकता त्यागेको प्रमाण पेस गरी नेपाली नागरिकता पुनःप्राप्ती नगरेको भन्दै सांसद पद खारेज गरिदिएको थियो । नेपाली नागरिकता नभएको व्यक्ति सांसद हुन नपाउने व्यवस्था छ ।