दुई पांग्रे सवारीको ट्रायलमा एक जना नक्कली परीक्षार्थी पक्राउ

१८ माघ, भक्तपुर । भक्तपुरमा दुई पांग्रे सवारीको ट्रायलस्थलबाट एक जना नक्कली परीक्षार्थीलाई प्रहरीले पक्राउ गरेको छ । मंगलबार ईजिवे ट्रायल सेन्टरबाट एकजना नक्कली परीक्षार्थी पक्राउ गरेको हो ।

पक्राउ पर्नेमा दोलखा गौरीशंकर गाउँपालिका–५ का २५ वर्षीय देवबहादुर श्रेष्ठ रहेको प्रहरीले जनाएकाे  छ ।

उनलाई मध्यपुर ठिमी नगरपालिका–९ राधेराधेस्थित ईजिवे ट्रायल सेन्टरबाट युवराज खड्काको नाममा नक्कली बनेर ट्रायलमा सहभागी भएको अवस्थामा पक्राउ गरिएको हो ।

विशेष सूचनाको आधारमा काठमाडौं उपत्यका ट्राफिक प्रहरी कार्यालय रामशाहपथबाट खटिएको टोलीले पक्राउ गरेको भक्तपुर प्रहरी परिसरले जनाएको छ ।

सोही घटनाको वास्तविक परीक्षार्थी खड्कालाई कार्यालयमा झिकाई थप अनुसन्धानको लागि कार्यालयको हिरासतमा राखिएको छ ।