अध्यक्ष तिमिल्सिनाले निवास हडपेपछि बासस्थान खोज्दै सभामुख

१८ माघ, काठमाडौं । सरकारले निवास उपलब्ध गराउन नसकेपछि माघ ५ गते निर्वाचित भएका प्रतिनिधिसभाका सभामुख  देवराज घिमिरेले अहिलेसम्म सरकारी निवास पाउन सकेका छैनन् । उनलाई निवास खोज्न सरकारी संयन्त्र विगत १० दिनदेखि निरन्तर खटिएको छ । निवास उपलब्ध गराउनुपर्ने निकाय शहरी विकास मन्त्रालय हो । तर, उसले अहिलेसम्म सभामुखलाई राख्ने स्थान पाउन सकेको छैन् ।

यसअघिका सभामुख सरकारी निवास बालुवाटारमा बस्दै आएका थिए । घिमिरे पनि सभामुखमा निर्वाचित भएर शपथ लिएपछि उतै जानुपर्ने हो तर, सभामुखका लागि भनेर बनाइएको निवास राष्ट्रियसभा अध्यक्ष गणेशप्रसाद तिमिल्सिनाले ओगटेर राखेका छन् । वालुवाटारस्थित सभामुखको सरकारी निवास उनले नछाडे पछि नवनियुक्त सभामुख घिमिरेको बासस्थान अझै तय हुन सकेको छैन् ।

बालुवाटारमा प्रधानमन्त्री प्रधानन्यायाधीश र सभामुखको सरकारी निवास छ । तत्कालिन सभामुख कृष्णबहादुर महरा यौन दुर्व्यवहारको आरोपमा पक्राउ परेपछि उनी बसेको सभामुखको निवासमा अध्यक्ष तिमिल्सिना सरेका थिए । उनी अहिले त्यो निवास छाड्न तयारी छैनन् । सभामुख घिमिरे त्यही निवासमा मात्र बस्ने र अध्यक्ष तिमिल्सिना नछाड्ने अडानमा बसेपछि शहरी विकास मन्त्रालय तनावमा परेको छ । सभामुखका लागि कतै भवन भेटिएको छैन् ।

यसअघिका सभामुख अग्नि सापकोटा चयन भएर आउँदा पनि पुरानो सभामुख निवासवाट तिमिल्सिना नहटे पछि सापकोटालाई लैनचौरमा नयाँ भवन खोजेर व्यवस्थापन गरिएको थियो । तर, अहिले सभामुख चयन भएर आएका घिमिरेले पुरानै सभामुख निवास खोजेर लैनचौर जान मानिरहेका छैनन, जसका कारण सहरी विकास मन्त्रालयलाई सभामुखको नयाँ भवन तयार पार्न समस्या परिरहेको छ ।

शहरी विकास मन्त्रालयका एक कर्मचारीले भने, ‘पुरानो सभामुख निवासवाट राष्ट्रियसभा अध्यक्ष सर्न मान्नु हुन्न, लैनचौरमा सभामुखज्यूले जान्न भन्नु भा छ, अब नयाँ भवन कहाँ खोज्ने ? छलफल गरिहेका छौ, निवास खोज्ने काम पनि भइरहेको छ । जहाँ पायो त्यहाँ निवास मिलाउन पनि भएन । नयाँ संसद भवन पनि बनिसकेको छैन । यद्यपी सभामुख घिमिरेलाई नयाँ बास स्थानको व्यवस्थापन मन्त्रालय लागिरहेको छ । हेरौँ कहिले मिल्छ ।’