क्रिकेट संघ विवादः कार्यवाहक सचिवमा पाठक, साधारणसभा फागुन १४-१५ मा गरिने

१८ माघ, काठमाडौं । नेपाल क्रिकेट संघ (क्यान)ले कार्यवाहक सचिवको जिम्मेवारी दुर्गाराज पाठकलाई दिएको छ । क्यान हालै सम्पन्न टि २० लिग खेलमा स्पट फिक्सिङमा तानिएपछि विवाद चर्किएको थियो ।

यही अवस्थाबीच मंगलबार पोखरामा भएको कार्यसमिति बैठकमा सचिव प्रशान्त विक्रम मल्लले राजीनामा दिएका थिए । उनको राजीनामापछि कार्यसमिति सदस्य पाठकलाई कार्यवाहकको जिम्मेवारी दिइएको हो । मल्लकाे राजीनामा स्वीकृत गरेपछि पाठकलाई कार्यवाहककाे जिम्मेवारी दिइएकाे हाे ।

बैठकमा अध्यक्ष चतुरबहादुर चन्द लगायत कार्य सम्पादन समितिका पाँचै जनाको राजीनामा माग भएको थियो । त्यसमा सचिव मल्लको पनि राजीनामा मागिएको थियो । अध्यक्ष चन्दले भने राजीनामा दिन अस्वीकार गरेको छ ।

बैठकले क्यानको साधारण सभा आगामी फागुन १४ र १५ गते सुर्खेतमा गर्ने निर्णय गरेको छ । नेपाल टी–२० लिगका लागि व्यापारिक तथा रणनीतिक साझेदारीका रुपमा भित्रिएको विवादित भारतीय कम्पनी सेभेन थ्रीसँगको सम्झौता रद्द गर्ने वा नगर्नेबारे साधारणसभाले नै निर्णय गर्नेछ ।

सेभेन थ्रीले भने सम्झौता रद्द गरेको पत्र क्यानलाई पठाइसकिएको जनाएको छ ।