गठबन्धन दलका नेताको घेराबन्दीमा प्रधानमन्त्री प्रचण्ड

१८ माघ, काठमाडौं । गृह मन्त्रालय आफैसँग राख्ने र राष्ट्रपतिमा राष्ट्रिय सहमति खोज्ने भनेपछि प्रधानमन्त्री पुष्पकमल दाहाल प्रचण्ड सत्ता गठबन्धनमा रहेका दलका नेताको घेराबन्दीमा परेका छन् । सरकारी कामको चाप बढिरहेका बेला गठबन्धन दलका स्वार्थकेन्द्रित विषयले नै प्रधानमन्त्री प्रचण्डलाई गलाउने परिस्थिति बनिरहेको छ । राज्य सत्तालाई जनताको सेवामा लगाउनेभन्दा पनि गठबन्धनमा रहेका दल र तिनका नेताहरु प्रधानमन्त्रीलाई गलाएर स्वार्थसिद्ध गर्ने रणनीतिमा देखिएका छन् ।

स्वार्थकेन्द्रित विषयले गर्दा सत्ता गठबन्धन विघटनको डिलमा पुगेको अडकल राजनीतिक क्षेत्रमा हुन थालेको छ । यीनै विषयको पेरोफेरोमा रहेर बुधबार सत्ता गठबन्धनको नेतृत्व गरिरहेको नेकपा एमालेका अध्यक्ष केपी शर्मा ओली र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले प्रधानमन्त्रीलाई बालुवाटारमा भेटेर राष्ट्रिय स्वतन्त्र पार्टीका सभापति रवि लामिछानेलाई गृहमन्त्री बनाउन दवाव दिएका छन् ।

सत्तारुढ दलबीच खटपट परिरहेको बेला प्रधानमन्त्री प्रचण्डलाई गृहमन्त्रीबारे दवाव दिन अध्यक्ष ओली बालुवाटार पुगेका थिए । प्रधानमन्त्री निवास बालुवाटारमा भएको भेटमा समसामयिक राजनीतिबारे भन्दा पनि रविलाई गृहमन्त्री नबनाएको विषयमा छलफल भएको बताइएको छ । गृह मन्त्रालय पुनः राष्ट्रिय स्वतन्त्र पार्टीलाई दिने कि नदिने भन्ने विषयलाई लिएर सत्ता साझेदार दलहरुबीच विवाद बढेको छ । प्रधानमन्त्री प्रचण्डले गृह मन्त्रालय आफैंसँग राख्ने खोजे पनि ओलीले रास्वपालाई नै दिन दवाव दिंदै आएका छन् । रास्वपाले पनि आफूले गृह मन्त्रालय नपाए सरकारबाट बाहिरिने चेतावनी दिएको छ ।

आजै बिहान प्रधानमन्त्री प्रचण्डसँग राप्रपाका अध्यक्ष एवम् उपप्रधानमन्त्री राजेन्द्र लिङ्देनले पनि भेटवार्ता गरेका छन् । सर्वोच्च अदालतको फैसलापछि पदमुक्त भएका रवि लामिछानेले गृह मन्त्रालयमा फर्कन बालुवाटारदेखि बालकोटको परिक्रमालाई तीव्र पारेका बेला लिङदेनले पनि यसैमा दवाव दिएका छन् । दोहोरो राहदानीको विषयमा प्रहरी प्रशासनले उनीमाथि अनुसन्धान पूरा गरेको छैन, तर तालुकवाला मन्त्रालयको नेतृत्वमा पुगेर अनुसन्धान प्रभावित गर्न खोजेको भन्दै गठबन्धनभित्र र बाहिर पनि विरोध भइरहेको छ । तर, सार्वजनिक आलोचनाको वास्तै नगरी शक्तिमा पुग्न रवि पनि आतुर देखिएका छन् ।

आइतबार नेपालको नयाँ नागरिकता लिएका लामिछानेले त्यही दिन पार्टीका तीन बैठक बसाएर साधारण सदस्य, केन्द्रीय सदस्य, केन्द्रीय सभापति बन्ने प्रक्रिया पूरा गरेका थिए । साँझ बालुवाटार पुगेर उनले उपप्रधानमन्त्री तथा गृह मन्त्रालयमा दाबी गरेका थिए । प्रधानमन्त्री प्रचण्डबाट सकारात्मक जवाफ नपाएपछि उनी राति नै एमाले अध्यक्ष ओलीलाई भेट्न बालकोट पुगेका थिए । सोमबार पनि ओलीसँग भेट गरेका लामिछाने मंगलबार बिहान प्रधानमन्त्री प्रचण्ड भेट्न बालुवाटार गएका थिए । प्रधानमन्त्री प्रचण्डले माओवादी बैठकमा विषय राखदा पनि गृह नदिन भनिएको थियो ।

लामिछानेलाई पुनर्बहाल गर्न एमाले अध्यक्ष ओली, राप्रपा अध्यक्ष लिङदेन र स्वयम् लामिछानेबाट लगातार दवाव आए पनि कानुनी राज्यको सम्मान गर्दै तत्काल उनलाई जिम्मेवारी दिन गाह्रो हुने प्रचण्डको भनाइ छ । उनले सकेसम्म इंगेज भइरहने, यो गठबन्धन नटुटोस् भन्ने प्रयास आफ्नो रहेको र अदालतको पूर्णपाठ पनि कुर्नुपर्ने आवश्यकता सरकारसँग रहेको उनको भनाइ छ । लिङदेन बुधबार बिहान प्रधानमन्त्रीसँग उनले रवि लामिछानेलाई मन्त्रीमा नियुक्त गर्न भन्दै नगर्दा गठबन्धनमा समस्या आउने बताएका थिए ।

प्रधानमन्त्री प्रचण्डले भने लामिछानेका विषयमा विभिन्न आरोपहरू लागेको र छानबिन समेत चलिरहेको भन्दै सर्वोच्च अदालतको फैसलाको पूर्णपाठ आएर राहदानीको विषय टुंगोमा पुगेपछि मात्र मन्त्री बनाउन उपयुक्त हुने बताएको बालुवाटार स्रोतले जनाएको छ । यसले पनि सत्तासाझेदार दलबीच गृहमन्त्री कसलाई बनाउने भन्ने विषय पेचिलो बनेको छ । मंगलबार बसेको माओवादी पदाधिकारी बैठकमा प्रचण्डले तत्काल लामिछानेलाई गृहमन्त्री नबनाउने जानकारी गराएका थिए ।

बुबार गृहमन्त्रीको जिम्मेवारीसमेत सम्हालेका प्रधानमन्त्री प्रचण्ड, अध्यक्ष ओली र ऊर्जामन्त्री लिङ्देनबीच भएको कुराकानीले पनि सत्ता गठबन्धन सहज वातावरणमा नरहेको प्रष्ट पारेको छ । प्रधाानमन्त्री प्रचण्डमााथि बढेको दवाव हेर्दा सरकार बचाउनकै लागि पनि उनले सत्तासाझेदारी दलका कुरा गलत नै भएपनि मान्नुपर्ने अवस्था देखिएको छ । प्रधानमन्त्री प्रचण्ड यसै विषयमा केहिदिनदेखि दाहोरो दवावमा पनि परिरहेका छन् । हालको गठबन्धनमा खटपट आएपछि कांग्रेससहितका दललाई सरकारमा सहभागि गराउने प्रयास पनि उनीबाट भइरहेको बताइएको छ ।