बाँदर आतंक नियन्त्रणबारे संसदमा सरकारकाे ध्यानाकर्षण

१८ माघ, काठमाडौं । प्रतिनिधिसभाको आजको बैठकमा बाँदर आतंकको विषयले स्थान पाएको छ । शून्य समयमा बोल्दैन सांसद ईश्वरबहादुर रिजालले दोलखामा बढेको बाँदर आतंक नियन्त्रण गरेर खाद्य सुरक्षा गर्न माग गरेका छन् ।

बुधबार बसेको प्रतिनिधिसभाको बैठकमा उनले दोलखामा बाँदर आतंक बढ्दा बसाईंसराइको घटना बढेको भन्दै सरकारको ध्यानाकर्षण गराए ।

बादर आतंक नियन्त्रण गरेर संविधानप्रदत्त खाद्य सुरक्षाको सुनिश्चित गर्न माग गरेका उनले बाली बिमाको कार्यक्रम पनि लागु गर्न सरकारसँग माग गरे । बाँदरका कारण देशैभरका किसान बाली जोगाउन नसक्दा खेतीबाट हात झिक्ने अवस्थामा पुगेको भन्दै सरोकारवालाहरुले समेत बारम्बार सरकारको ध्यानाकर्षण गराउँदै आएका छन् । तर सरकारले नसुनेझैं गर्दै आइरहेको छ ।

हामी कृषिमा आत्मनिर्भरको कुरा गरिरहेका छौं, तर बाँदरको साम्राज्य बढेको छ, बाँदरले मानिसको उठिबास लगाएको छ’ सांसद रिजालले भने, ‘बाँदर नियन्त्रणका लागि एक अध्ययन टोली बनाइयो, नागरिकको खाद्य अधिकारको सुरक्षा गरियोस् ।’

पछिल्लो चरणमा बाँदरले प्याज, लसुन, फर्सी र खुर्सानीमा समेत क्षति पुर्याउन थालेका छन् । स्थानीय तहले वितरण अनुदानमा वितरण गरेको ‘बाँँदरे बन्दुक’लाई समेत बाँदरले अटेर गर्ने गरेको किसानको गुनासो छ ।

जारी बैठकमा सांसदहरुले समसामयिक विषयमा सरकारको ध्यानाकर्षण गराइरहेका छन् ।