प्रधानमन्त्रीको निर्देशनलाई लिएर सत्ता पक्षका सांसदबीच जुहारी

१८ माघ, काठमाडौं । संविधानले स्वीकार गरेका विषयविपरित गएर मन्त्रिपरिषदका सदस्यहरुलाई नबोल्न प्रधानमन्त्रीले निर्देशन दिएको विषयलाई लिएर बुधबारको प्रतिनिधिसभा बैठकमा सत्ता पक्षका सांसदबीच जुहारी चलेको छ । धर्मनिरपेक्षता, गणतन्त्र र संघीयता जस्ता विषयकाबिरुद्ध नजान मन्त्रीहरुलाई प्रधानमन्त्रीले निर्देशन दिएको अवस्थामा मन्त्रीहरु त्यसकाबिरुद्ध गएको भन्दै सत्ता पक्षका सांसद रघुजी पन्तले प्रश्न उठाएपछि राप्रपाका सांसदहरुले त्यसको प्रतिकार गरेका छन् ।

नेकपा एमालेका सांसद रघुजी पन्तले संविधानका आधारभूत संरचनाहरूमै प्रधानमन्त्री र मन्त्रीहरूबीचमा सार्वजनिक मतभेद देखिएको भन्दै आलोचना गरेपछि लगत्तै बोलााका राप्रपाका महामन्त्रीसमेत रहेका डा. धवलशमशेर राणाले संसदमा आफूहरुलाई हेपिएको भन्दै नहेप्न चेतावनी दिए । प्रतिनिधिसभाको बुधबारको बैठकमा बोल्दै पन्तले संविधानबमोजिम शपथ लिएको मन्त्रीले संविधानको भावनाविपरीत बोल्न नहुने बताएका थिए ।

उनले भने, राजनीतिक एजेन्डा बनायो भने न पाकिस्तान, बंगलादेश र भारत शान्त छ, मन्त्री भएर राय बनाउन थाल्दा कुन बाटोमा जान्छ भन्ने हो । राप्रपाको आफ्नो विचार होला, सांसदले बोल्लान्, तर मन्त्री भएर बर्खिलापमा बोल्न मिल्दैन । राष्ट्रियसभामा प्रधानमन्त्री बोल्ने अनि त्यसको भोलिपल्ट संविधानको आधारभूत मान्यताविरुद्ध मन्त्री नै जाने ? यो संविधान र कानुनको अधिनमा रहेर मन्त्रीहरूले गतिविधि अघि बढाउनुपर्दछ । संविधानको प्रस्तावनामै लेखिएको छ । संविधानअनुसार शपथग्रहण गर्नुभएका र शपथ लिनुभएको हो, मन्त्रीहरूले । प्रधानमन्त्रीसँग फरक मत राख्न मिल्दैन ।’

पन्तको भनाइको प्रतिकार गर्दै राणाले आफूहरुलाई हिन्दुराष्ट्र र राजासहितको प्रजातन्त्र स्थापित गर्नकै जनताले मत दिएको भन्दै संसदमा नहेप्न चेतावनी दिए । सांसद पन्तले राप्रपाबाट मन्त्री बनेका नेताहरुले हिन्दुराष्ट्र र राजतन्त्रको वकालत गरेको भन्दै विरोध जनाएपछि राप्रपा नेता राणाले आफ्नो बोल्ने पालोमा धर्मनिरपेक्षता र गणतन्त्रलाई संविधानले अपरिवर्तनीय विषय नमानेकाले बोल्न पाउनुपर्ने बताउँदै भने, ‘हामी नेपालमा फेरि सनातन धर्म हिन्दु राष्ट्र कायम गर्न आएका छौं, हामी फेरि राजासहितको प्रजातन्त्र स्थापित गर्न आएका छौं । धर्म निरपेक्षता र गणतन्त्रविरुद्ध बोल्न संविधानले रोक्दैन । संविधानमा अपरिवर्तनीय बुँदा होइन, हामीले बोल्न पाउनुपर्छ बोल्छौँ ।’

आफूहरुलाई हिन्दु राष्ट्र र राजसंस्थाको वकालत गर्न जनताले मत दिएको पनि महामन्त्री राणाले बताए । उनले प्रधानमन्त्री र नेकपा माओवादीप्रति लक्ष्ति गर्दै भने, ‘यो व्यवस्था नमान्ने भएको भए हामी जंगल जान्थ्यौं, यही व्यवस्था र यही संविधानभित्र बसेर यो संविधानलाई हामीले बोकेका मूल्य मान्यताभित्र परिवर्तन गर्न राष्ट्रिय प्रजातन्त्र पार्टीलाई जनताले भोट दिएर हामी आएका छौं । हामीलाई हेप्ने काम, हामीलाई होच्याउने काम यो सदनबाट आइन्दा फेरि नहोस् ।’

एमालेका सांसद् पन्तले संविधानका आधारभूत संरचनाहरूमै प्रधानमन्त्री र मन्त्रीहरूबीचमा सार्वजनिक मतभेद देखिएको भन्दै प्रधानमन्त्रीको पनि आलोचना गरे । ‘प्रधानमन्त्रीले संघीयताविरुद्व बोल्नेलाई स्पष्टिकरण सोध्छु भन्नुभएको भोलिपल्ट सरकारका मन्त्रीहरूले संघीयता रहनुहुँदैन भनेर बोल्नुभयो, प्रधानमन्त्रीले अहिलेसम्म स्पष्टिकरण सोधेको थाहा छैन । प्रधानमन्त्री र मन्त्रीहरूका बीचमा सार्वजनिक विवाद भएको राम्रो होइन ।’

उनले धर्मका कारण विश्वमा धेरै युद्धहरू भएपनि नेपालले शान्तिको सन्देश दिएको बताउँदै भने, ‘नेपाल बुद्ध जन्मिएको देश हो । बुद्ध विश्व शान्तिका दुत हुन् । त्यसैले हामी यहाँ धर्मका माध्यमबाट जोडियौँ, जोड्ने माध्यम बनाऔँ । यो सरकारले स्थिरता दिन्छ होला, तर संविधानका आधारभूत विषयहरूमा प्रश्न उठाउन पाइदैन ।’ सांसद पन्तले अहिलेको सरकार संयुक्त सरकार भएकाले न्यूनतम साझा कार्यक्रमलाई आधार बनाएर सञ्चालित हुनुपर्ने पनि बताए ।

यस्तै सत्ता पक्षका अर्का सांसद एवं नेकपा माओवादी केन्द्रका नेता शक्ति बस्नेतले संघीयता कार्यान्वयनलाई प्रभावकारी बनाउन नसक्दा संघीयताविरुद्ध आवाज उठेको आरोप लगाए । उनले संघीयताको आवश्यकताको औचित्य कर्णाली, सुदूरपश्चिम प्रदेशमा पुगेर हेर्न अनुरोध पनि गर्दै बुधबारको प्रतिनिधिसभा बैठकमा उनले राजधानी काठमाडौं बसेर संघीयताको विरध गर्न नपाइने बताए । उनले भने, ‘व्यवस्था फेरियो अवस्था फेरिएन भन्ने छ । संघीयता किन आवश्यक छ भनेर हेर्न कर्णाली सुदूरपश्चिम पुगेर हेरे हुन्छ । सरकारमा बसेर संविधानको विरुद्धमा बोल्न नपाइने संविधानमै उल्लेख छ ।’