माओवादीको स्थायी कमिटी बैठक, सरकारको किचलो र प्रधानमन्त्रीका गुनासो मै सीमित

२० माघ, काठमाडौं । केही दिनदेखि नेकपा माओवादी केन्द्र कहिले स्थायी कमिटी र कहिले पोलिटव्युरो बैठक राखेर पार्टी र सरकारका कामकारवाहीबारे छलफल गरिरहेको छ । आज पनि स्थायी कमिटीको बैठक छ । तर, प्रायः बैठकहरु ठोस निर्णयतिर भन्दा सरकार र प्रधानमन्त्रीका गुनासा मै सीमित देखिएकाे छ ।

पार्टीका विभाग र नेताहरुको कार्यविभाजनका लागि भनेर ठाकिएको स्थायी कमिटी तीन पटक सरेर बिहीबार केहीबरे बसेर आज शुक्रबार पनि बस्दैछ । तर, बैठकले प्रधानमन्त्री पुष्पकमल दाहाल ‘प्रचण्ड’का सरकार र सरकारमा रहेका दलका स्वार्थकेन्द्रित गुनासा सुन्नेबाहेक केही गर्न सकेको छैन् । न पार्टीका काम भएका छन् न प्रधानमन्त्रीलाई एउटा निर्णयमा बस भन्न नै सकेको छ ।

समसामायिक राजनीति, राष्ट्रपति निर्वाचन, गृहमन्त्री चयनदेखि पार्टीका स्थायी र पोलिटब्युरो सदस्यको केन्द्रिय विभागको कार्यविभाजनका लागि बसेको बैठकले एक हप्ता नाघिसक्दा पनि कुनै निष्कर्ष निकाल्न सकेको छैन । हिजो अपरान्ह ४ बजे बसेको बैठकले कुनै निष्कर्ष निकाल्न नसकेपछि आज पनि बैठक बोलाइएको हो । आज दिउँसो ३ बजे बैठक बोलाइएको छ ।

हिजो बसेको बैठकमा प्रधानमन्त्रीसमेत रहेका पार्टी अध्यक्ष प्रचण्डले गठबन्धनमा समस्या आएको ब्रिफिङ गरेपछि सकिएको थियो । उनले गठबन्धनमा समस्या आएकाले छलफलमा जुट्नुपर्ने भएकाले आफूलाई समय चाहिएको बताएका थिए ।

उनले बैठकमा रास्वपाको मात्रै नभएर गठबन्धनमा नै समस्या आएको बताएका थिए । यद्यपि बहिर आएर प्रचण्डले राजनीतिक समीकरण नफेरिने बताएका थिए । आज पनि उनले सरकारका कामबारे पार्टीलाई जानकारी दिने क्रार्यक्रम छ ।