पहिलो पटक सुदूरपश्चिम प्रदेशसभाको आधिकारिक वेभसाइट ह्याक !

२० माघ, कैलाली । सुदूरपश्चिम प्रदेश सभाको आधिकारिक वेभसाइट ह्याक भएको छ । प्रदेशसभा सचिवालयसँग प्राविधिक जनशक्ति नभएका कारण वेबसाइट कसले ह्याक गरेको भन्ने खुलेको छैन ।

शुक्रबार बिहान वेबसाइट ह्याक भएपछि अनलाइन प्रणालीका सूचनामा पहुँच अवरुद्ध भएको प्रदेशसभा सचिवालयले जनाएको छ । ह्याक भएको वेभसाइट सूचारु गराउने प्रयास भइरहेको सचिवालयले बताएको छ।

वेभसाइटमा अंग्रेजी अक्षरहरु देखिएकाले अमेरिकन ह्याकरहरुले ह्याक गरेको हुन सक्ने अनुमान गरिएको छ। वेभसाइट कसरी ह्याक भयो भन्ने विषयमा कुनै जानकारी नभएको सचिवालयले बताएको छ। कसले र किन समस्या उत्पन्न गरेको भन्ने अनुसन्धान भइरहेको बताइएको छ।  सुदूरपश्चिममा पहिलो पटक प्रदेश सभाको वेभसाइट ह्याक भएको हो।