एमसीसी कुलमान घिसिङलाई बोकेर आइरहेको छः विप्लव

२० माघ, काठमाडौं । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले एमसीसी परियोजना कम्युनिस्टलाई सिध्याउने योजनामा नेपाल प्रवेश भएको बताएका छन् ।

साम्राज्यवादले एमसीसीमार्फत विकासको लोभ देखाएर देशभित्रबाट विकास र परिवर्तनको योजनाकार कम्युनिष्ट खत्तम पार्ने योजनाअनुरूप काम गरिरहेको बताए ।नेपाल कम्युनिस्ट पार्टी पश्चिम लुम्बिनी ब्युरोको प्रशिक्षण कार्यक्रममा सम्बोधन गर्दै महासचिव विप्लवले साम्राज्यवादले संसदीय कम्युनिस्टलाई भोट र क्रान्तिकारी कम्युनिस्टलाई दमन गरेर सिध्याउने नीति लिएको बताए ।

महासचिव विप्लवले पछिल्लो चरणमा एमसीसीको केही नलाग्ने भएपछि कुलमान घिसिङलाई प्रयोग गरेर लफसिफेदीमा जग्गा कब्जा गर्नतिर लागेको बताए । एमसीसी देशभित्र रहन दिएसम्म नेपालमा राजनीतिक संकट थप बढेर जाने उनको भनाइ थियो । नेपाली जनताको अधिकार र स्वाधीनताको लडाइँमा कुलमान प्रयोग हुन नहुने उनको भनाइ छ ।

उनले माथिल्लो कर्णाली परियोजनामा भारतीय कम्पनीले राष्ट्रघात जारी राखेको भन्दै परियोजना नेपालले बनाउने मुद्दामा नेकपाले निरन्तर लड्ने बताए । ‘माथिल्लो कर्णाली बचाउन ज्यान दिने कार्यकर्ता हाम्रा नै छन् र देशका लागि ज्यान दिने पार्टी पनि हाम्रो हो । जनआधारित पार्टी र नेता कार्यकर्ता बनाउने जनताले नै हो । त्यसैले आफ्ना सुख दुःखमा भेट्न पाउने कार्ययोजना पार्टीले लिएको छ’ उनले भने । एमसीसी अमेरिकी सेना नेपालभित्र प्रवेश गराएर अखडा तयार पार्ने उद्देश्यले आएको भन्दै नेकपाले एमसीसी सम्झौता खारेजीको माग गर्दै विरोध प्रदर्शन गर्दै आइरहेको छ ।

एमसीसी परियोजनामा आएको रकमले काठमाडौंको लफ्सीफेदीदेखि रुपन्देहीको सुनौलसम्म विद्युत प्रसारण लाइन निर्माण गर्ने भनिएको छ । सो क्रममा लफ्सीफेदीमा नेपाल विद्युत प्राधिकरणले प्रसारण लाइन टावर निर्माणका लागि जग्गा अधिग्रहणको कामलाई अगाडि बढाइरहेको छ ।

सो क्रममा स्थानीय बासिन्दा जग्गा दिन अस्वीकार गर्दै प्रदर्शमा उत्रिएपछि प्राधिकरणका कार्यकारी निर्देशक कुलमान घिसिङले स्थानीयसँग पटकपटक वार्ता गरेका छन् । वार्ता अझै मिलेको छैन ।