कांग्रेसले राष्ट्रपति निर्वाचन र राष्ट्रिय राजनीतिबारे विपक्षी दलहरुसँग छलफल गर्दै

२१ माघ, काठमाडौं । नेपाली कांग्रेसले आसन्न राष्ट्रपतिको निर्वाचन र राष्ट्रिय राजनीतिक घटनाका विषय सरकारबाहिर रहेका राजनीतिक दलहरुसँग छलफल गर्दैछ । विपक्षी दलको बैठक बिहान ११ बजे सिंहदरवारमा राखिएको छ । सरकार सञ्चालन र भागबण्डा प्राप्तिका विषयमा सत्ता साझेदार दलहरुबीच खटपट चलिरहेका बेला प्रमुख प्रतिपक्ष दल नेपाली कांग्रेसले विपक्षी दलहरुको बैठक बोलाएको हो ।

सत्ता गठबन्धनमा गृहमन्त्री र गृह मन्त्रालयको विषय चरम उत्कर्षमा छ । यसैबेला प्रमुख प्रतिपक्षी दल कांग्रेसले विपक्षी दलहरूको बैठक बोलाएको छ । शनिबार बिहान ११ बजे पार्टीको संसदीय दलको कार्यालय सिंहदरबारमा बैठक बोलाइएको हो । बैठका सरकारमा सहभागी नभएका सबै दलका शीर्ष नेताहरुलाई बोलाइएको छ । विपक्षी दलहरुको बैठक पछिल्लो राजनीतिक घटनाक्रम, सरकारमा देखिएको अस्थिरता, सत्तारुढ दलबीचमा बढदै गएको मतभिन्नताले आगामी दिनमा पार्ने असरबारे छलफल गर्न बोलाइएको हो ।

राष्ट्रियसभामा रिक्त एक सांसद पदको उपनिर्वाचन, उपाध्यक्षको निर्वाचन र राष्ट्रपति निर्वाचको विषयमा विपक्षी दलहरुको साझा धारण कसरी बनाउन सकिन्छ भनेर छलफल गर्न बैठक डाकिएका कांग्रेस प्रवक्ता प्रकाशशरण महतले जानकारी दिएका छन् । राष्ट्रियसभामा रिक्त रहेको उपाध्यक्ष पदको निर्वाचन माघ २३ गते हुँदै छ । यस्तै निर्वाचन आयोगले फागुन २५ गतेका लागि राष्ट्रपति निर्वाचनको मिति घोषणा गरेको छ । दुई निर्वाचनका लागि प्रतिपक्षी दलहरू कसरी अघि बढ्ने भनेर कांग्रेसले तयारी गर्न बैठक बोलाएको हो ।

पुस १० गते तत्कालीन गठबन्धन टुटेर एमाले, माओवादीसहितको सातदलीय गठबन्धन बनेपछि कांग्रेस, नेकपा एकीकृत समाजवादीलगायत दल विपक्षमा छन् । तर, पुस २६ गते प्रधानमन्त्री पुष्पकमल दाहाल प्रचण्डले विश्वासको मत लिँदा यी दलहरूले पनि प्रधानमन्त्री प्रचण्डको पक्षमा विश्वासको मत हालेका थिए । त्यसपछि भएका सभामुख, उपसभामुख पदको निर्वाचनमा नयाँ गठबन्धन बन्ने आंकलन गरिएपनि भएको थिएन् ।

विपक्षमा रहेका दलहरूले फरक ढंगबाट गठबन्धन बनाउने प्रयास गरेका थिए । तर, प्रयास सफल हुन सकेन । राष्ट्रपति निर्वाचनमा भने कांग्रेसले वर्तमान गठबन्धन भत्काएर गोप्य मतदानको फाइदा उठाउँदै राष्ट्रपति निर्वाचनमा आफू सफल हुने तयारी गरिरहेको छ । त्यसकारण सरकारमा नभएका दलहरूसहित सरकारलाई समर्थन दिएको जसपा, नागरिक उन्मुक्ति पार्टीलाई पनि कांग्रेसले विश्वासमा राख्न खोजिरहेको छ । त्यसैको प्रयासमा शनिबारका लागि बैठक बोलाइएको प्रवक्ता महतको भनाइ छ ।

अहिले सत्ता गठबन्धनमा आइरहेको खटपटले यो साझेदारी लामो समयसम्म जान नसक्ने निष्कर्ष विपक्षी दलहरुको छ । उनीहरुले समेत प्रधानमन्त्रीलाई विश्वासको मत दिएकाले प्रधानमन्त्री अप्ठ्यारोमा पर्दा के गर्ने भन्नबारे पनि विपक्ष दलमा छलफल चलिरहेको छ । संसदमा सबैभन्दा ठूलो दलको हैसियत बनाएको नेपाली कांग्रेससहितका विपक्षी दलहरु कोर्ष करेक्सन गरेर पुरानो बाम लोकतान्त्रिक गठबन्धनलाई व्युताउने प्रयासमा पनि छन् । यसबारे नेकपा माओवादीले पनि अप्रत्यक्ष रुपमा केहि संकेत पनि दिइरहेको छ । पछिल्लो समय एमालेसँगभन्दा कांग्रेसँग सहकार्य सहज हुने मनस्थितिमा प्रधानमन्त्री पुगेका छन् ।