नागरिकका समस्याप्रति सरकार गम्भिर भएनः उपसभापति गुरूङ

२२ माघ, काठमाडौं । नेपाली कांग्रेसका उपसभापति एवं सांसद धनराज गुरुङले सरकार नागरिकप्रति उत्तरदायी बन्न नसकेको आरोप लगाएका छन् । एउटा नागरिकले जिउँदै शरीरमा आगो लगाएर आत्मदाह गर्दा पनि सरकारको ध्यान तान्न नसकेको उनको भनाइ छ । प्रतिनिधिसभाको आइतबारको बैठकमा बोल्दै उनले नागरिकले आत्मदाहले नछोएको सरकारका मन्त्रीहरू नयाँ गाडी किन्न निवेदन लिएर हिँडिरहेको भन्दै नागरिकका समस्यप्रति ध्यानदिन आग्रह गरे ।

उपसभापति गुरुङले भने, ‘जता हेर्याे, त्यतै समस्यामात्रै छ । नागरिक समस्याले जकडिएर आत्महत्या गर्न बाध्य छ । आत्महत्या त दिनहुँ भइरहेका छन् । तर आत्मदाह नै गरेपछि मात्रै हाम्रो नजर पर्न थालेको छ । अहिले त आत्मदाहले पनि हाम्रो ध्यान तान्न छोडिसकेको हो कि भन्ने देखिएको छ ।’ उनले एउटा नागरिकले दिन दहाडै आर्थिक संकटमा परेर आत्मदाह गर्दा पनि सरकारले उसले देखाएको संकटप्रति कुनै चासो र समाधान खोज्न नसकिरहेको बताए ।

गुरुङले भने,‘एउटा नागरिकले दिनदहाडै आर्थिक संकटमा परेर जिउँदै शरीरमा आगो लगाउँछ । व्यवसायीहरूमा कोकोहोलो मच्चिरहेको छ । तैपनि मन्त्रीहरू पुरानो गाडी भयो, नयाँ गाडी पाऊँ भनेर निवेदन ठोकिरहेको सुन्दैछौँ । हामी यस्तो नियति भोगिरहेका छौँ,’ उनले भने, ‘गफ त ठूलठूला सुनिन्छ, तर नागरिकले के चाहेका छन् ? कसरी देशको आर्थिक अवस्थालाई माथि उठाउने भनेर ध्यान दिएको देखिँदैन ।’

उनले देशले असल नेताको खोजी गरिरहेको बताए । ‘यसपालि नयाँ आशा बोकेका साथीहरू आउँदा ऊर्जा थपिएको थियो । तर, उहाँहरू पनि उही मन्त्री पाउनका लागि लुछाचुँडी गर्नमै व्यस्त देखिनुभएको छ,’ उनले भने, ‘जनताले जुन जोगी आए पनि कानै चिरेका भनेर भन्न थालेका छन् ।’