दलहरुलाई जनमतले दिएको सन्देश नै राष्ट्रिय सहमति होः सचिव पौडेल

२२ माघ, काठमाडौं । नेकपा माओवादी केन्द्रका सचिव एवं प्रतिनिधिसभा सदस्य देवेन्द्र पौडेलले अहिलेको जनमतको सन्देश नै मुख्य मुख्य राजनीतिक दलहरूबीच मिलेर जाऊ भन्ने रहेको बताए । उनले अहिलेको संविधान, व्यवस्थाको स्थायित्व र कार्यान्वयन तथा मुलुकको आर्थिक समृद्धि र विकासका लागि राष्ट्रिय सहमतिको आवश्यकता रहेको बताए ।

प्रतिनिधिसभाको आइतबारको बैठकमा बोल्दै उनले ७० वर्षभन्दा लामो संघर्षबाट प्राप्त भएको संविधानका उपलब्धिहरूको रक्षा गरेर अघि बढ्नुको विकल्प नभएको बताए । उनले यो व्यवस्था ल्याउनका लागि नेपाली जनताले गरेको ७० वर्ष लामो संघर्षप्रति सम्मान गर्न यही व्यवस्थाका कारण सदनमा बहस भइरहेको बताए । उनले अहिलेको संविधान र व्यवस्था त्यतिकै नआएको र यसको रक्षा गर्दै जनताको भावना र विकासलाई जोडेर अघि बढ्नु सबै राजनीतिक शक्तिको दायित्व भएको बताए ।

पौडेलले अहिले देशलाई राष्ट्रिय सहमतिको खाँचो रहेको औंल्याउदै भने, ‘हामीले राष्ट्रिय सहमतिको आवश्यकताको कुरा उठाइरहेका छौँ । वास्तवमा यो संविधान र यो व्यवस्थाको स्थायित्वका लागि राष्ट्रिय सहमतिको खाँचो छ । अहिले पनि निजामती सेवा ऐन जारी हुन सकेको छैन । संघीयता आयो, स्थानीय सरकारहरू गठन भए । तर, संघले कानुन नबनाउँदा स्थानीय सरकारले कानुन बनाउन पाएका छैनन् । यी विषयहरू हल गर्नका लागि फेरि पनि देशका प्रमुख पार्टीहरूका बीच मिलेर जानुपर्ने अहिलेको जनताको जनमतको सन्देश नै मिलेर जाऊ भन्ने छ । शान्ति प्रक्रियालाई तार्किक निष्कर्षमा पु¥याउनका लागि पनि हामीले राष्ट्रिय सहमति गरेर अघि बढ्नुपर्नेछ ।’