टर्की भूकम्पमा परी पाँच सयभन्दा बढीको मृत्यु, प्रधानमन्त्रीद्वारा दुःख व्यक्त

२३ माघ, काठमाडौं । प्रधानमन्त्री पुष्पकमल दाहाल प्रचण्डले टर्कीमा आएको भूकम्पमा परी पाँच सभयभन्दा नागरिकको मृत्यु भएको घटनाप्रति दुःख व्यक्त गरेका छन् । उनले मृतकहरुप्रति श्रद्धाञ्जली अर्पण गर्दै नेपाल सरकार र नेपाली जनताको तर्फबाट शोकसन्तप्त सबैमा समवेदना प्रकट गरेका छन् । स्थानीय समयअनुसार आज बिहान ४ बजेर १७ मिनेटमा दक्षिण पूर्वी टर्कीको नियन्त्रणमा रहेको सिरियाली भूभागमा केन्द्रबिन्दु रहेको ७.८ म्याग्निच्युडको भूकम्पमा परी मृत्यु दुबै देशहरूमा गरी पाँच सयभन्दा बढीको मृत्यु भएको छ ।

यो अहिलेसम्मकै सबैभन्दा ठूलो भूकम्प हो । उद्धार कार्यमा खटिएकाले अहिलेसम्म पाँच सयभन्दा बढीको शव निकालेको बताइएको छ । ३७ लाख सिरीयाली शरणार्थीहरू बसोबास गरिररहेको सो स्थानको नजिकै केन्द्रबिन्दु भएर भूकम्प गएको बताइएको छ । यो विश्वको सबैभन्दा बढी शरणार्थी शिविर हो । अमेरिकी भौगर्भिक सर्भेका अनुसार स्थानीय समयअनुसार सोमबार बिहान ४ः१७ बजे टर्कीको दक्षिण पूर्वी क्षेत्रमा पर्ने सिरियाली गाजियान्टेप नजिकै १७.९ किलोमिटरको गहिराइमा केन्द्रबिन्दु भइ सो भूकम्प गएको हो ।

युनिभर्सिटी कलेज अफ लण्डनका स्टेफेन हिक्कका अनुसार अहिलेसम्म ४० वटा भूकम्पका पराकम्पन गइसकेका छन् । मुख्य भूकम्प गएको दश मिनेटपछि ६.७ म्याग्निच्युडको पराकम्पन गएको छ । भूकम्पमा परी सिरियाको अलेप्पो, लाटकिया, हामा र टार्टस प्रान्तमा गरी २३७ भन्दा बढीको मृत्यु र छ सय जना घाइते भएका छन् । भूकम्पको धक्का लेबनान, साइप्रसमा पनि महसुस गरिएको थियो ।

भूकम्पका कारण सम्भावित सुनामीको मध्यनजर गरी इटालीमा जोखिम न्यूनीकरणको व्यवस्थापन गरिएको बीबीसीले उल्लेख गरेको छ । ८० वर्ष अघि टर्कीमा सन् १९३९ मा ७.८ म्याग्निच्युडको भूकम्प जाँदा ३० हजार सर्वसाधारणको मृत्यु भएको थियो । यस्तै, २०२० जनवरीमा ६.७ म्याग्निच्युडकोको भूकम्प जाँदाच ४१ जनाको ज्यान गएको थियो ।