नाबालिका बलात्कारकाे अभियोग लागेका वडाध्यक्ष श्रेष्ठ जेल चलान

२४ माघ, बारा । नाबालिकालाई बलात्कार गरेको अभियोगमा प्रहरी हिरासतमा रहेका निजगढ नगरपालिका वडा नम्बर २ का वडाध्यक्ष राजु भनिने राजन श्रेष्ठलाई जेल चलान गरिएको छ ।

उनलाई बारा जिल्ला अदालतले मुद्दाको पुर्पक्षको लागि थुनामा पठाउने आदेश दिएसँगै जेल चलान गरिएको हो । उनलाई वीरगन्ज कारागार चलान गरेको प्रहरीले जनाएको छ ।

गत असोज १९ गते छिमेककी १४ वर्षीया एक बालिकालाई घरमै बोलाएर बलात्कार गरेको आरोप लगाउदै पीडित किशोरीले असोज २५ मा उनीविरुद्ध प्रहरीमा किटानी जाहेरी दिएकी थिइन् । जाहेरी परेपछि फरार रहेका श्रेष्ठ आफैं प्रहरीमा पुगेर आत्म समर्पण गरेका थिए ।

त्यसपछि पक्राउ गरी अनुसन्धान सकेर सरकारी वकिलर्का कार्यालयमार्फत अदालतमा मुद्दा दायर गरिएको थियो । सो मुद्दामाथि न्यायाधीश तारादेवी महर्जनको एकल इजलासले सोमबार उनलाई जेल पठाउने निर्णय सुनाएको थियो ।
पहिलो सुनुवाई हुँदा थुनछेक बहसको क्रममा कसुरदार देखिएकोले हाललाई पुर्पक्षमा पठाउने आदेश भएको जिल्ला सहन्यायधिवक्ता भीमसेन काफ्लेले बताए ।

जिल्ला सरकारी वकिलको कार्यालयले अभियुक्त श्रेष्ठलाई कसुर गरेअनुसारको १२ देखि १४ वर्षसम्म कैद सजाय र पीडितलाई क्षतिपूर्ति भराउने माग दाबी गर्दैै अदालतमा अभियोगपत्र दर्ता गराएको थियो ।