राष्ट्रियसभा सदस्यमा भोली विहान १० देखि ३ बजेसम्म मतदान

२४ माघ, बुटवनल । राष्ट्रियसभाको रिक्त एक सदस्य पदको उपनिर्वाचन अन्तर्गत भोली बुधबार विहान १० देखि दिउँसो ३ बजेसम्म मतदान हुने भएको छ । निर्वाचन कार्यलयले मतदानको समय तोकेको हो । लुम्बिनीमा राष्ट्रियसभा सदस्य एक पदका लागि बुधवार हुने उपनिर्वाचनको सम्पूर्ण तयारी सकिएको छ । घोराहीको कर्मचारी मिलन केन्द्रमा मतदानका लागि व्यवस्था मिलाएको निर्वाचन कार्यालयका प्रमुख नारायण प्रसाद भण्डारीले जानकारी दिएका छन् ।

लुम्बिनी प्रदेशमा एक सिटका लागि निर्वाचनमा तीन जनाको उम्मेदवारी परेको छ । एमाले उम्मेदवार कुमार दसौदी, प्रमुख प्रतिपक्षी काँग्रेसका माधवप्रसाद आचार्य र नागरिक उन्मुक्ति पार्टीका राजेन्द्रवीर राय उम्मेदवार बनेका छन् । उनीहरु तीन जनाबीच प्रतिस्पर्धा हुनेछ ।
दसौदी र आचार्य दुवै रोल्पाका हुन् भने रायको पुरानो घर कर्णालीको सल्यान हो । पछिल्लो समय उनी बाँकेमा बस्दै आएका छन् ।

राष्ट्रियसभा सदस्यका लागि प्रदेशसभा सदस्य र पालिकाका प्रमुख तथा उपप्रमुखले मतदान गर्ने छन् । उनीहरुको मतभार फरफरक हुन्छ । प्रदेशसभा सदस्यको एक जनाको मतभार ४८ र स्थानीय तहका प्रमुख उपप्रमुखमध्ये हरेकको मत भार १८ कायम छ ।

लुम्बिनी प्रदेशमा कुल मतदाता संख्या ३०५ जना छन् । जसमध्ये प्रदेश सांसदको संख्या ८७ र पालिका प्रमुख तथा उपप्रमुखको संख्या २१८ जना रहेको प्रदेश निर्वाचन कार्यालय दाङका सूचना अधिकारी गेहेन्द्र कँवरले जानकारी दिए । गत असोज २३ गते नेकपा एमालेबाट राष्ट्रियसभा सदस्यमा निर्वाचित रुपन्देहीका खिमलाल भट्टराईले राजीनामा दिएपछि रिक्त रहेको स्थानमा पदपूर्तिका लागि उपनिर्वाचन हुन लागेको हो ।