धेरै बिदाले गर्दा जनसेवाका काम प्रभावित भएः प्रधानमन्त्री प्रचण्ड

२४ माघ, काठमाडौं । प्रधानमन्त्री पुष्पकमल दाहाल प्रचण्डले सरकारी बिदा धेरै भएकाले जनसेवाका काम प्रभावित भएको बताएका छन् । उनले बिदाका कारण सेवा प्रवाह प्रभावित भएकाले यसमा पुनर्विचार आवश्यक भएको बताएका छन् । मंगलबार बिहान प्रधानमन्त्री तथा मन्त्रिपरिषद्को कार्यालयमा प्रजातन्त्र दिवस मूल समारोह समितिको बैठकलाई सम्बोधन गर्दै प्रधानमन्त्री प्रचण्डले बिदामा पुनर्विचार आवश्यक भएको बताएका हुन् ।

आवश्यकता र महत्व हेरेर बिदा घाउनुपर्ने प्रधानमन्त्रीको भनाइ छ । बैठकमा उनले भने, ’हाम्रा सरकारी बिदाहरू धेरै भए । यसले जनताका काम गर्ने समय कम भएको छ, सेवा प्रवाहमा समस्या देखिएको छ । यसबारे पुनर्विचार आवश्यक छ भनेर हामीले मन्त्रिपरिषदमा पनि छलफल गरेका छौँ । गृहकार्य गरेर यसमा पुनर्विचार गर्नुपर्छ ।’

प्रधानमन्त्रीले प्रजातन्त्र दिवस, लोकतन्त्र दिवस, गणतन्त्र दिवसमा एकै प्रकृतिका कार्यक्रम गरिँदै आएकाले त्यसबारे समेत थप छलफल आवश्यक भएको बताएका छन् । उनले भने, ’हामीले गणतन्त्र दिवस मनाउँछौँ, प्रजातन्त्र दिवस मनाउँछौँ, लोकतन्त्र दिवस मनाउँछौँ । तर, ती सबै कार्यक्रमको चरित्र एउटै छ । त्यसलाई कसरी एकीकृत गर्ने, राष्ट्रिय दिवसमा जनताको सहभागिता कसरी गर्ने भन्नेबारे पनि छलफल आवश्यक छ ।’

बैठकले आगामी फागुन ७ गते विविध कार्यक्रमका साथ प्रजातन्त्र दिवस मनाउने निर्णय गरेको छ । त्यसका लागि प्रधानमन्त्रीको संयोजकत्वमा मूल समारोह आयोजक समितिसमेत गठन गरिएको छ । प्रधानमन्त्रीले सम्बन्धित मन्त्रालयका कर्मचारीलाई अवस्था र आवश्यकता हेरेर बिदा कटौतीका लागि गृहकार्य थाल्न निर्देशन पनि दिएका छन् । प्रजातन्क्र लोकतान्त्र र गणतन्त्रका नाममा दिइने बिदा एउटा मात्रै बनाउने कोसि गर्न निर्देशन पनि दिएका छन् ।