सर्वोच्च र उच्चमा न्यायाधीश सिफारिस गर्न न्याय परिषदकाे बैठक बस्दै

२५ माघ, काठमाण्डौं । सर्वोच्च अदालत र उच्च अदालतमा रिक्त रहेको न्यायाधीश पदमा नाम सिफारिसबारे छलफल गर्न न्याय परिषद्को बैठक बस्ने भएको छ । न्याय परिषद सचिवालय उच्च स्रोतले दिएको जानकारी अनुसार कुन मापदण्ड अपनाएर न्यायाधीशमा नाम सिफारिस गर्ने भन्नेबारे छलफका लागि बैठक बस्ने भएको हो । बुधबार बस्ने भनिएको बैठकको समय भने तोकिएको छैन् ।

अहिले सर्वोच्च अदालतमा ५ जना न्यायाधीशको पद खाली छ । यसअघि सिफारिस भएका तीन जनाको संसदीय सुनुवाइ हुन नपाएपछि सिफारिस भएकाहरुले नियुक्ति पाउन सकेका थिएनन् । उनीहरुको सिफारिस रद्ध भएपछि अहिले सर्वोच्चमा ५ जना न्यायाधीशका लागि नाम सिफारिस गर्नुपर्ने छ । सर्वोच्चमा खाली रहेको ५ सीटका लागि २५ जनाको प्रतिस्पर्धा रहेको बताइएको छ । यसअघि जिल्ला र उच्चमा न्यायाधीश सिफारिसको मापदण्ड बनाइएको थियो ।

प्रधानन्यायाधीश चोलेन्द्र शमशेर राणामाथि महाअभियोग लागेकाले त्यस यता सर्वोच्च कामु प्रधानन्यायाधीशका भरमा चलिरहेको छ । महाअभियोग लागेका राणा पनि गत मंसिर अन्तिम साताबाट अवकाशमा गइसकेका छन् । उनीमाथि महाअभियोग लागेपछि वरिष्ठतम न्यायाधीश दीपककुमार कार्की कामु प्रधानन्यायाधीश भएर काम चलाएका थिए । अहिले कामु प्रधानन्यायाधीशमा हरिकृष्ण कार्की रहेका छन् । उनकै अध्यक्षतामा न्याय परिषद्को बैठक बस्दैछ ।

यतिबेला न्याय परिषद्को अध्यक्षमा हरिकृष्ण कार्की र सदस्यहरुमा कानुनमन्त्री ध्रुबबहादुर प्रधान, न्यायाधीश विश्वम्भरप्रसाद श्रेष्ठ,न्याय परिषद सदस्यद्वय रामप्रसाद भण्डारी र रामप्रसाद श्रेष्ठ रहेका छन् । भण्डारीलाई तत्कालिन प्रधानमन्त्री केपी शर्मा ओलीले न्याय परिषद्मा ल्याएका थिए भने श्रेष्ठ नेपाल बारको कोटाबाट न्याय परिषद सदस्यमा नियुक्त भएका हुन् । यीनै पाँच सदस्यीय न्याय परिषद्ले सर्वोच्च र उच्च अदालतमा न्यायाधीशहरु सिफारिस गर्नेछ ।

उच्च अदालतमा ३२ जना न्यायाधीश पद रिक्त भएको बताइएको छ । यसअघि दीपककुमार कार्की कामु प्रधानन्यायाधीश भएका बेला सिफारिस भएका २७ जनाको पनि नियुक्त हुन सकेको थिएन । उनीहरुको सिफारिस पनि रद्ध भएको छ । अब बस्ने न्याय परिसद बैठकले उच्चमा रिक्त रहेका ३२ सीटमा न्यायाधीश सिफारिस गर्नुपर्छ ।

आजको बैठकमा पाँच सदस्यहरुले आफ्नो तहबाट न्यायाधीश बनाउनेहरुको नाम बैठकमा पेस गर्ने बताइएको छ । स्रोतका अनुसार कानुनमन्त्री प्रधानले मात्रै बैठकमा सर्वोच्च र उच्चमा गरी नौ जनाको नाम पेस गर्ने बुझिएको छ । सबैले पेस गरेका नामहरुमध्येबाट छानविन गरी न्यायाधीशका लागि नाम सिफारिस गरिनेछ । सर्वोच्चमा विभागबाट दुई र बाहिरबाट तीन जना सिफारिस हुने बताइएको छ ।