पुष १० को सहमतिबारे उच्चस्तरीय संयन्त्रमा छलफल हुने

२५ माघ, काठमाडौं । नेकपा माओवादीका अध्यक्ष पुष्पकमल दाहाल प्रचण्डलाई पुष १० मा प्रधानमन्त्री बनाउदा भएका सहमति कार्यान्वयनबारे छलफल गर्न उच्चस्तरीय राजनीतिक संयन्त्रको बैठक बिहीबार बस्ने भएको छ । एमाले अध्यक्ष केपी ओली भेट्न ओली निवास बालकोट पुगेका प्रधानमन्त्री प्रचण्डले बिहीबार उच्चस्तरीय राजनीतिक संयन्त्रको बैठक राख्ने सहमति भएको बताएका छन् ।

संयन्त्रको बैठकमा सत्ता गठबन्धनका दलबीच भएको सहमति कार्यान्वायबारे विशेष छलफल हुनेछ । सोही बैठकमा सत्ता गठबन्धनको राष्ट्रपतिको साझा उम्मेदवारबारे छलफल हुने छ । साथै सरकारका काम कारवाही, न्युनतम साझा कार्यक्रम, मन्त्रिपरिषद विस्तार र सरकारबाट बाहिरिएको राष्ट्रिय स्वतन्त्र पार्टीलाई फेरी सरकारमा सहभागी गराउनेबारे पनि छलफल हुने बताइएको छ ।

उच्चस्तरीय राजनीतिक संयन्त्रको संयोजकसमेत रहेका ओलीलाई भेट्न प्रधानमन्त्री प्रचण्ड आज बिहान ओली निवास बालकोट गएका थिए । सोही भेटवार्तामा बिहीबार राजनीतिक संयन्त्रको बैठक बोलाउने र राष्ट्रपतिको उम्मेदवारबारे छलफल गर्ने प्रधानमन्त्री प्रचण्डले बताए । बालकोटबाट बाहिरिने क्रममा प्रचण्डले सहज ढंगले सरकारलाई अघि बढाउने लगायतका राजनीतिक विषयमा उच्चस्तरीय राजनीतिक संयन्त्रको बैठकमा छलफल गरिने बताए ।

राष्ट्रपति पदको निर्वाचन आगामी फागुन २५ गते हुँदैछ । तर सत्ता साझेदार दलबीच नै राष्ट्रपतिको उम्मेदवारबारे एक मत छैन । एमालेले राष्ट्रपति आफूले पाउनुपर्ने अडान राख्दै आए पनि प्रधानमन्त्री प्रचण्ड सहमत छैनन् । यही मतभेदका कारण सत्ता साझेदार दलबीच खटपट भइरहेका बेला प्रधानमन्त्री प्रचण्डले आज ओलीसँग भेटवार्ता गरेका हुन् । हिजो पनि उनीहरुबीच बालुवाटारमा छलफल भएको थियो ।