मुख्यमन्त्रीको आग्रहमा सुदूरपश्चिमको प्रदेशसभा बैठक स्थगित

२५ माघ, काठमाडौं । आवश्यक मत नपुग्ने भएपछि मुख्यमन्त्री राजेन्द्रसिंह रालवको आग्रहमा सुदूरपश्चिम प्रदेशको प्रदेशसभा बैठक स्थगित भएको छ । बुधबार रावलले विश्वासको मत लिने कार्यसूची रहेको थियो । तर, विश्वासको मत लिँदा आवश्यक मत नपुग्ने देखियो र बैठक स्थगित भएको एमालेका एक सांसदले बताए ।

उनका अनुसार मुख्यमन्त्री रावलले विश्वासको मत पाउने निश्चित नभएपछि उनकै आग्रहमा बैठक स्थगित भएको हो । प्रदेशसभामा नेकपा एमाले संसदीय दलका नेता रावल गत पुस २७ गते नेपालको संविधान २०७२ को धारा १६८ (२) बमोजिम सुदूरपश्चिमको मुख्यमन्त्रीमा नियुक्त भएका थिए । अव बैठक भोली बिहीबारका लागि बोलाइएको छ । तर, विश्वासको मत पुग्ने आधार छैन् ।

एमालेसहित नेकपा माओवादी केन्द्र, नागरिक उन्मुक्ति पार्टी र राप्रपाको समर्थनमा उनी मुख्यमन्त्रीमा नियुक्त भएका थिए । मुख्यमन्त्रीमा नियुक्त भएको ३० दिनभित्र विश्वासको मत लिइसक्नुपर्ने संवैधानिक व्यवस्थाअनुसार रावलले भोलि विश्वासको मत लिनैपर्ने हुन्छ । नत्र संसदको ठूलो दलको हैसियतमा नेपाली कांग्रेसले सरकार बनाउनेछ ।

त्रिपन्न सदस्यीय प्रदेशसभामा कुनै पनि दलको एकल बहुमत छैन । मुख्यमन्त्रीलाई बहुमत सिद्ध गर्न २७ मत आवश्यक पर्छ । सत्ता गठबन्धनमा निर्णायक शक्तिको रुपमा देखिएको नागरिक उन्मुक्ति पार्टीले विश्वासको मत दिने नदिने अडानमा छ । नागरिक उन्मुक्ति पार्टीका प्रमुख सचेतक लक्ष्मणकिशोर चौधरीले आजसम्म सरकारलाई विश्वासको मत दिने आधार तयार नभएको बताए । सो पार्टीले टीकापुर घटनाका बन्दी रिहाइको माग गर्दै आएको छ ।

प्रदेशसभामा सत्तापक्षीय नेकपा एमालेका दश, माओवादी केन्द्रका सभामुखबाहेक दश, नागरिक उन्मुक्तिका सात र राप्रपाका एक सदस्य छन् । विपक्षमा रहेको नेपाली कांग्रेसका १९, नेकपा एकीकृत समाजवादीका चार र एक स्वतन्त्र सदस्य रहेका छन् । कांग्रेसले ठूलो दलको हैसियतले सरकार बनाउनुपर्ने अवस्था आए पनि विश्वासको मत दिनुपर्ने हुन्छ । त्यो समयमा उनसले अरु दललाई मिलाउन नसके फेरी संकट आउनेछ ।