सुदूरपश्चिम मुख्यमन्त्रीको पद जाने संभावना बढ्यो, बैठक ४ बजेलाई सारियो

२६ माघ, धनगढी । सुदूरपश्चिम मुख्यमन्त्रीको पद जाने संभावना बढेको छ । यसअघि मुख्यमन्त्री नियुक्तिमा समर्थन पाएको नागरिक उन्मुक्तिले मुख्यमन्त्रीमा विश्वासको मत नदिने भएपछि मुख्यमन्त्री एमालेका राजेन्द्र सिंह रावललको पद जाने निश्चित प्रायः भएको हो ।

उनले पद जोगाउन प्रदेशसभा बैठकबाट विश्वासको मत लिने दिन आज अन्तिम हो । सोही प्रयोजनका लागि आज दिउँसो १ बजेका बोलाइएको प्रदेशसभा बैठक सारेर बिहीबार दिउँसो ४ बजेका लागि बोलाइएको प्रदेशसभा सचिव देवबहादुर बाेगटीले सूचनामार्फत जानकारी दिएका छन् ।

केन्द्रीय निर्देशनबमोजिम नाउपा सातै जना प्रदेशसभा सदस्य काठमाडौंमा छन् । उनीहरूलाई बिहीबार काठमाडाैं नछाड्न पार्टीकाे निर्देशन छ ।

सरकार र सरकारमा रहेका ठूला दलहरुले पार्टीका संस्थापक रेशम चौधरी लगायत थारु नेताहरुको रिहाइसम्बन्धी दिएका आश्वसन झुठा सावित भएको जनाउँदै नाउपाले रावललाई विश्वासको मत नदिने निर्णयमा पुगेका छन् ।

पद जोगाउन सहमतिको सम्भावना खोजीका लागि बैठक सारिएको हो । सभामुख माओवादी केन्द्रबाट छन् । मुख्यमन्त्री रावलले बिहीबार विश्वासको मत लिनैपर्ने संवैधानिक बाध्यता छ । उनले विश्वासको मत लिन नसकेमा स्वतः पदमुक्त हुन्छन् ।

त्यसपछि प्रदेशसभामा रहेका सबैभन्दा ठूलो दल नेपाली कांग्रेसको संसदीय दलको नेतालाई प्रदेश प्रमुखले मुख्यमन्त्री नियुक्त गर्नुपर्नेसंवैधानिक व्यवस्था छ । उनले पनि नियुक्तिको ३० दिनभित्र प्रेदशसभा बैठकबाट विश्वासको मत लिनुपर्नेछ । त्यसबेला विश्वासको मत लिन नसके उनी पनि पदबाट स्वतः च्यूत हुनेछन् ।

५३ सदस्य रहेको यस प्रदेशमा माओवादी केन्द्रका ११, एमालेका १०, नाउपाका ७ र राप्रपाका एक गरी २९ सदस्यको समर्थनमा रावल पुष २७ मा मुख्यमन्त्री नियुक्त भएका थिए । अहिले नाउपाले मत नदिने भएपछि सत्ता समिकरणमा धक्का पुग्ने भएको छ ।

विपक्षमा रहेका नेपाली कांगेसका १९, एकीकृत समाजवादीका ४ र स्वतन्त्र १ जोडदा पनि वैकल्पिक सरकार बन्ने संभावना छैन ।