सांसद उपस्थिति नभएपनि सभामुखले संसद बैठक चलाउन सक्ने

२६ माघ, काठमाडौं । प्रतिनिधिसभा नियमावली मस्यौदा समितिले प्रतिनिधिसभाको बैठक सांसदको उपस्थितिबिनै पनि चलाउन सकिने व्यवस्था गर्न लागेको छ । यो व्यवस्था अनुसार सभामुखले सांसदहरु प्रत्यक्ष रुपमा उपस्थित नभएपनि भर्चुअल विधिमार्फत बैठक सञ्चालन गर्न सक्नेछन् । यसले बैठक कक्षामा सांसदहरुको उपस्थिति नभएपनि हुने भएको छ ।

प्रतिनिधिसभा नियमावली मस्यौदा समितिले सांसदहरूको भर्चुअल माध्यमबाट उपस्थिति भए पनि बैठक बस्ने व्यवस्था गरेको हो । मस्यौदा समितिको बिहीबारको बैठकले भर्चुअल माध्यमबाट सांसदहरू उपस्थित भएमा बैठक बस्नसक्ने व्यवस्था गरेको हो । प्राकृतिक प्रकोप वा महामारीको कारण भौतिक उपस्थितिमा बैठक बस्न सम्भव छैन भन्ने कुरामा सभाका कम्तीमा एक चौथाई सदस्य सहमत भई सो कुरा सभामुखलाई जानकारी गराएमा आवश्यकताअनुरुप कार्यव्यवस्था समितिको परामर्शमा सभामुखको निर्णयअनुसार प्रविधिको प्रयोग गरी भर्चुअल माध्यमबाट पनि बैठक राख्न सकिनेछ ।

त्यस्तो बैठकको कार्यविधि सभामुखले निर्धारण गरेबमोजिम हुने व्यवस्था गरिएको छ । मस्यौदा समितिले नियमावलीको टुंगो लागेपछि संसद्मा प्रस्तुत गर्नेछ । २०७४ मा निर्वाचित संसद्पछि कोरोनाका कारण भर्चुअल माध्यमबाट संसद् बैठक बस्न सक्ने अवस्था थिएन । नियमावलीको व्यवस्था नभएकाले त्यस्तो बैठक हुन सकेको थिएन । कोरोना महामारीलाई नै मध्यनजर गर्दै नियमावली मस्यौदा समितिले उक्त व्यवस्था गरेको हो । बैठकले अहिले नियमावलीमा समाबेस गराउने विषयमा छलफल गरिरहेको छ ।