मुख्यमन्त्री रावलकाे प्रस्ताव अस्वीकृत, एक महिनामै ढल्याे सुदूरपश्चिम प्रदेश सरकार

२६ माघ, धनगढी । सुदूरपश्चिम प्रदेशका मुख्यमन्त्री राजेन्द्र सिंह रावलले राखेको विश्वासको मत लिने सम्बन्धी प्रस्ताव अस्वीकृत भएको छ । बिहीबार बसेकाे प्रदेशसभा बैठकमा उनकाे प्रस्ताव बहुमतले अस्वीकृत भएकाे हाे ।

उनले बैठकमा विश्वासको मत लिनेसम्बन्धी प्रस्तावमाथि विचार गरियोस् भनी राखेको प्रस्ताव बैठकमा उपस्थित बहुमत सदस्यहरुले हुन्न भन्ने पक्षमा मत दिएपछि अस्वीकृत भएको हो । योसँगै रावल मुख्यमन्त्रीबाट पदमुक्त भएका छन् । उनी गएको पुष २७ मा ५३ मध्ये २९ सदस्यको समर्थनमा मुख्यमन्त्री नियुक्त भएका थियो ।

उनको प्रस्ताव अस्वीकृत भएसँगै सुदूरपश्चिम प्रदेश सरकार एक महिनामै ढल्न पुगेको छ । नियुक्तिका बेला समर्थन गरेका नागरिक उन्मुक्ति पार्टीका सातै जना सदस्यहरु बैठकमा अनुपस्थित भएपछि उनी पदमुक्त भएका हुन् ।

ध्वनि मतको आधारमा सभामुखले प्रस्ताव अस्वीकृत भएको घोषणा गरेका थिए ।