उच्चस्तरीय राजनीतिक संयन्त्रको बैठक बालुवाटारमा जारी

२७ माघ, काठमाडौं । नेकपा एमालेका अध्यक्ष केपी शर्मा ओली नेतृत्वको उच्चस्तरीय राजनीतिक संयन्त्रको बैठक प्रधानमन्त्री निवास बालुवाटारमा बसिरहेको छ । बैठकमा सरकारमा देखिएको विवाद, मन्त्रिपरिषद विस्तार र राष्ट्रपतिको निर्वाचनबारे छलफल भइरहेको बताइएको छ ।

बिहीवार दिउँसो ३ बजेको लागि बोलाइएको संयन्त्रको बैठक स्थगित भएपछि आज बसेको हो । बैठकमा प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओली, सरकारबाट बाहिरिएको राष्ट्रिय स्वतन्त्र पार्टीका अध्यक्ष रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङ्देन सहभागी छन् । सरकारबाट बाहिरिएको रास्वपाले पनि सरकारलाई समर्थन जारी राखेको छ ।

प्रचण्ड नेतृत्वको सरकारलाई समर्थन दिएका जनता समाजावदी पार्टी, जनमत पार्टी र नागरिक उन्मुक्त पार्टीका प्रतिनिधि भने उपस्थित भएका छैनन् । सरकारलाई समर्थन दिएपनि उन्मुक्ति पार्टी रेशम चौधरीको रिहाइलाई मुख्य सर्त बनाएको छ । यसै विषयमा सहमति नहुँदा उन्मुक्तिले बिहीबार सुदूरपश्चिम प्रदेशका मुख्यमन्त्री राजेन्द्रसिंह रावललाई विश्वासको मत नदिदा एमाले सरकार ढलेको थियो ।

संयन्त्रको बैठक स्थगित गरेर प्रधानमन्त्री पुष्पकमल दाहाल र संयन्त्रका संयोजक तथा नेकपा (एमाले) का अध्यक्ष केपी शर्मा ओलीबीच प्रधानमन्त्री तथा मन्त्रिपरिषद्को कार्यालय सिंहदरबारमा भेटवार्ता भएको थियो । उनीहरुबीच लगातार भेट भइरहे पनि के विषयमा छलफल भयो भन्ने कुरा बाहिर आउने गरेका छैनन् । राष्ट्रिपतिको विषयलाई लिएर ओलीले प्रधानमन्त्रीलाई दवाव दिँदै आएका छन् । आजको छलफलमा रास्वापलाई सरकारमा सहभागि गराउने मुख्य एजेण्डा रहेको छ ।