हिरासत फोडेर फरार अभियुक्तमध्ये दुई जना अझै पक्राउ परेनन्

२७ माघ, जनकपुर । धनुयाको महेन्द्रनगरस्थित ईलाका प्रहरी कार्यालयको हिरासत कक्षको भित्ता फोडेर फरार भएका ६ जना अभियुक्रमध्ये दुई जना अझै पक्राउ परेका छैनन् । उनीहरु फरार भएको ११ दिन बितिसक्दा समेत प्रहरीले पक्राउ गर्न नसकेको हो ।

यही माघ १५ गते राति हिरासतको भित्ता फोडेर ६ जना थुनुवा फरार भएका थिए । जसमध्ये चार जना पक्राउ परिसकेका छन् । बाँकी क्षिरेश्वरनाथ नगरपालिका–२ का रोशन यादव र मिथिला नगरपालिका–६ का शंकर महतोलाई प्रहरीले पक्राउ गर्न सकेको छैन ।

फरार यादव सार्वजनिक शान्ति सुरक्षाविरुद्धको अरोप र महतो हातहतियार तथा खरखजाना अभियोगमा अनुसन्धानकै क्रममा प्रहरी हिरासतमा थिए । अभियोगमा यादवलाई माघ ४ गते र महतोलाई १३ गते पक्राउ गरिएको थियो ।

फरार विनोद शर्मा, हरिदीप सिंह, मित मण्डल, रोशनकुमार महतो भने विभिन्न स्थानबाट प्रहरीले पुनः पक्राउ गरिसकेको छ । फरार घटनाबारे छानबिन गर्न गठित मधेश प्रदेश प्रहरीले वरिष्ठ प्रहरी उपरीक्षक मनोज यादवको नेतृत्वमा र जिल्ला प्रहरी कार्यालय धनुषाले प्रहरी नायव उपरीक्षक प्रदीपबहादुर क्षेत्रीको नेतृत्व छानबिन समितिले काम गरिरहेको छ । संयोजक क्षेत्रीलाई सरुवा गरिएको छ । सदस्यहरुले प्रतिवेदन तयार पर्ने काम भइरहेको र छिट्टै नै मधेश प्रहरी प्रमुखलाई प्रतिवेदन बुझाउने तयारी भइरहेको बताएका छन् ।

छानबिनका क्रममा हिरासत कक्ष अधिकृत सहायक प्रहरी निरीक्षक (असई) अशोक मण्डल, प्रहरी हवल्दार सरोज रेग्मी र प्रहरी जवान रोहन मगरलाई निलम्बन गरिएको छ । त्यहाँ कार्यरत अन्य २६ जना प्रहरीलाई जिल्लामा तानिएको छ ।