उच्चस्तरीय राजनीतिक संयन्त्रमै देखियो विवाद, तीन दलका नेता नआएपछि सकियो बैठक

२७ माघ, काठमाडौं । सत्ता गठबन्धनको उच्चस्तरीय राजनीतिक संयन्त्रको बैठक कुनै ठोस निष्कर्षविना नै सकिएको छ । सरकार र सत्ता गठबन्धनमा देखिएको तिक्तता हटाउन बैठक डाकिएको थियो । शुक्रबार बिहान प्रधानमन्त्रीको सरकारी निवास बालुवाटारमा बसेको संयन्त्रको बैठकमा प्रधानमन्त्री बनाउन समर्थन जनाएका तीन दलका प्रतिनिधि उपस्थित नै भएनन् ।

नागरिकता प्रकरणका कारण सरकारबाट बाहिरिएका राष्ट्रिय स्वतन्त्र पार्टीका सभापति रवि लामिछाने बैठकमा आएका थिए भने जनता समाजवादी पार्टी, नागरिक उन्मुक्ति पार्टी र जनमत पार्टीका नेता अनुपस्थित रहे । यसले पनि उच्चस्तरीय राजनीतिक संयन्त्रमा विवाव कामयै रहेको देखाएको छ । जसपा सरकारमा सहभागि नै भएको छैन भने जनमत सहभागि भएर पनि प्रधानमन्त्री र संयन्त्रप्रति असन्तुष्ट छ । नागरिक उन्मुक्ति पार्टीको विवाद त सतहमा नै आइसकेको छ ।

प्रधानमन्त्रीसहित चार दलका नेता उपस्थित बैठकमा पछिल्लो राजनीतक घटनाक्रम, आसन्न राष्ट्रपति पदको निर्वाचनलगात विषयमा छलफल भएको बताइएको छ । रास्वपालाई पुनः सरकारमा सहभागी हुन आग्रह गरिएको थियो । प्रधानमन्त्रीले रास्वपालाई सरकारमा आउन नभने पनि एमाले अध्यक्ष ओलीले फेरी तपाइको पार्टी सरकारमा आउनुपर्छ भनेका थिए । बैठकमा सरकार बनेयताको परिस्थितिबारे समीक्षा भएको थियो ।

जसपाका अध्यक्ष उपेन्द्र यादव अहिले जनकपुरमा रहेपनि नागरिक उन्मुक्तिका अध्यक्ष रञ्जीता श्रेष्ठ चौधरी काठमाडौंमै छन् । उनले शुत्रबार बिहान मात्र डिल्लीबजार कारागार पुगेर रेशम चौधरीसित भेट गरेकी थिइन् । जनमतका अध्यक्ष सीके राउत पनि उपत्यकाबाहिर छन् । मुख्य नेता नआउने अवस्थामा अर्को प्रतिनिधि नेता बैठकमा जाने प्रचलन छ । उनीहरुलाई तीन दिन अगाडाी नै खबर पठाइएको थियो । प्रचण्डलाई प्रधानमन्त्री बनाउन सहयोग गरेका तीन दलका नेता बैठकमा सहभागी नहुनुको कारण पछिल्लो समयमा सत्ता गठबन्धनमा असन्तुष्टि देखिनु रहेको जसपाका एक नेताले बताए ।