दाङ प्रहरीले स्कुटर चोरलाई मुद्दा नचलाई किन छाड्यो ?

२७ माघ, दाङ । गएको शुक्रवार दिउँसोको एक बजेर ३० मिनेट जाँदा नोवेल ट्रेडिङ प्रालिको घोराही–१५ बिपिचोक टिभिएस शोरुमबाट नचिनेका व्यक्तिले टिभिएस स्कुटर लगे । शोरुम सञ्चालक चित्रबहादुर विष्टका अनुसार शुक्रबार दिउँसो दुई लाख ९५ हजार नौसय मूल्यको एनटर्क स्कुटर चोरी भएको भन्दै सामाजिक सन्जालमा लेखे र प्रहरीमा उजुरी नै दिए । चोरीमा संलग्नलाई प्रहरीले पक्राउ नगरेको भन्दै सञ्चालक विष्टले असन्तुष्टि जनाउदै गुनासो गरे ।

बिष्टले सिसि क्यामरा फुटेजसहित निवेदन सोहिदिन जिल्ला प्रहरी कार्यालय दाङमा बुझाइएका थिए । त्यसपछि बल्ल प्रहरी अनुसन्धानमा जुट्यो । प्रहरीले घोराहीको कटुवाखोलाबाट स्कुटि फेला पार्यो । त्यसको केही दिनपछि प्रहरीले सिसिटिभि फुटेजको सहारामा स्कुटी चोरलाई पक्राउ गर्यो । माघ २४ गते घोराही ३ का कुमार रानालाई स्कुटर चोरीमा संलग्न भएको आरोपमा पक्राउ पनि गरेर ल्यायो । स्कुटी चोरिमा सलग्न ब्यक्तिलाई जिल्ला प्रहरी प्रमुख एसपी बिरबहादुर वली, डीएसपी राजन गौतम र मुद्धा फाँटमा कार्यरत सई देबबहादुर वली सहितका मुद्धा फाँटका प्रहरीले आर्थिक चलखेल गरेर २४ घण्टा नबित्दै मुद्धा नचलाई छाडे ।

पक्राउ परेका रानालाई छुटाउन डीएसपी गौतमलाई गुण्डा नाईकेका रुपमा चिनीएका गणेश नेपालीले जिप्रका पुगेर दबाब दिएका थिए । जिल्ला प्रहरी कार्यालय दाङले चोरीमा संलग्न ब्यक्तिमाथि मुद्धा नचलाई छाडेको जानकारी दिएको छ । घोराही बजारको मुख्य चोकमा दिउँसै चोरी हुनु र चार दिनपछि स्कुटि फेला पारेको तर चोरलाई कारवाही नगरी छाड्नुले प्रहरी प्रशासनमाथि गम्भीर प्रश्न उठको स्थानीयहरुले बताएका छन् ।

घटना यस्तो छ फुटेजमा

शोरुममा रहेको फुटेजमा देखिएअनुसार एकजना व्यक्ति बिहान ११ बजेर ५५ मिनेट जाँदा पुगेका हुन्छन् । त्यसअघि नै अर्का एकजनाले मोटरसाइकलबारे जानकारी लिइरहेका देखिन्छन् । शोरुमका कर्मचारी शिशिर घर्तीले ती व्यक्तिलाई मोटरसाइकील बारे ब्रिफिङ गरिरहेका हुन्छन् । ग्राहकको रुपमा पसेका ती व्यक्तिले पटक–पटक नजर बाहिर लगाउँछन् ।

सेकेन्ड हेण्ड स्कुटी खोज्न आएका व्यक्ति नयाँ बाइक सोधीखोजी गर्छन् । उनले बेला–बेलामा नजर लगाएकै शोरुमको पश्चिम ढोकाबाट मास्क हेल्मेट लगाएका व्यक्ति प्रवेश गर्छन् । उनीहरुबीच नचिनेको जस्तो व्यवहार देखिन्छ तर बेला–बेलामा नजर शंकास्पदरुपमा जुध्ने गर्छ । मास्क आधा खोलेका अघिदेखिनै बसेका व्यक्ति कुनै कारोबार नगरेर बाहिरिन्छन् । उनी बाहिरिदै गर्दा कुनै संकेत गरेजस्तै दुबैबीच हेराहेर हुन्छ । आपसमा बोलेको वा परिचित जस्तो अरु व्यवहार भने देखिन्न ।

शोरुमका कर्मचारी घर्तीका अनुसार यसअघि पनि आउने गरेका व्यक्ति हुन् । थोरै अघिपछि गरेर उनीहरु दुबैजना शोरुमबाट बाहिरिन्छन् । अघिल्ला व्यक्तिले शोरुम बाहिर निस्केर मोटरसाइकलमा गहिरो नजर लगाउँछन् । कसैलाई फोन गर्छन् । त्यसपछि दिउँसो स्कुटर हराउँछ । तिनै मास्क लगाएका हेलमेट लगाएका दोस्रो व्यक्ति जस्तै हुलिया भएकाले स्कुटर लगेको फुटेजमा देखिन्छ ।