चिकित्सक संघले गर्यो भोली आकस्मिकबाहेक देशभर स्वास्थ्य सेवा बन्द गर्ने निर्णय

२८ माघ, काठमाडौं । राष्ट्रपति विद्यादेवी भण्डरीको सवारीका क्रममा भएको प्रहरी दमनको विरोधमा आइतबार देशभरका स्वास्थ्य संस्थामा आकास्मिक बाहेकका सेवा बन्द हुने भएका छन् । प्रहरी दमनको विरोधमा नेपाल चिकित्सक संघले आइतबार देशभरका स्वास्थ्य संस्थामा आकस्मिकबाहेकका सबै सेवाहरू बन्द गर्ने निर्णय गरेको छ । शनिबार बसेको संघको केन्द्रीय कार्यकारिणी समितिको आकस्मिक बैठकबाट यस्तो निर्णय गरेको हो ।

संघले बैठकपछि जारी गरेको विज्ञप्तीमा स्वास्थ्यजस्तो संवेदनशील क्षेत्रको शान्ति सुरक्षाका निम्ति आवश्यक व्यवस्थापन गर्न तथा सुरक्षाको नाममा भीभीआईपीको सवारीबाट आम सर्वसाधारणले पाइरहेको दुःख र सास्तीलाई सदाको लागि अन्त गरी उचित विधि स्थापित गर्न यस्तो निर्णय लिइएको जनाइएको छ ।

बैठकले गरेको निर्णयानुसार मिति २०७९ माघ २९ गते आइतबार एक दिन देशभरका सरकारी तथा गैरसरकारी, निजी, सहकारी स्वास्थ्य संस्था, अस्पताल, निजी तथा सरकारी मेडिकल कलेज, प्रतिष्ठानलगायतका सम्पूर्ण स्वास्थ्य संस्था तथा अस्पतालहरूमा आकस्मिक सेवाबाहेकका अन्य सम्पूर्ण सेवाहरू बन्द गर्ने निर्णय गरिएको व्यहोरा उल्लेख छ ।

राष्ट्रपति विद्यादेवी भण्डारीको सवारीका क्रममा शुक्रबार राष्ट्रिय ट्रमा सेन्टरका वरिष्ठ अर्थोपेडिक सर्जन डा. जनिथलाल सिंहलगायत स्वास्थ्यकर्मीमाथि प्रहरीले लाठीचार्ज गरी घाइते बनाएको भन्दै संघले आपत्ति जनाएको छ । सो घटनामा सम्लग्न भएको भन्दै एक प्रहरी जवानलाई निलम्बन गरिए पनि यस्तो आदेश दिने काठमाडौंका प्रहरी प्रमुखमाथि कारवाही हुनपर्ने र राष्ट्रपतिले लिखित माफी माग्नुपर्ने भन्दै चिकित्सकहरु आन्दोलित भएका छन् ।