लुम्बिनीमा शपथ ग्रहणका लागि बनाइएको मञ्च हुरीले उडाएपछि २ घण्टा ढिला गरी मन्त्रीहरुको शपथ

२९ माघ, बुटवल । लुम्बिनी प्रदेश सरकारका नवनियुक्त ७ जना नवनियुक्त मन्त्रीले पद तथा गोपनियताको शपथ लिएका छन् । प्रदेश राजधानी दाङको राप्ती गाउँपालिका मौरीघाट्मा आयोजित समारोहमा प्रदेश प्रमुख अमिक शेरचनले नियुक्त भएका मन्त्रीलाई आइतबार शपथ खुवाएका हुन् ।

दिउँसो १ बजे प्रदेशसभा भवन परिसरमा हुने भनिएको कार्यक्रम हावाहुरीले मञ्च र टेन्ट भत्काइदिएपछि दुई घन्टा ढिला भएको हो । पुनर्गठित मन्त्रिपरिषदमा एमालेबाट ३ जना, माओवादी केन्द्रबाट २ जना तथा राप्रपा र जनमत पार्टीबाट एक–एक जना नियुक्त भएका थिए ।

आर्थिक मामिला मन्त्री जोखबहादुर महरा, भैतिक पूर्वाधार विकास मन्त्री इन्द्रजित थारु, स्वास्थ्य मन्त्री विष्णुप्रसाद पन्थी, वन तथा वातावरण मन्त्री दुर्गाप्रसाद चौधरी, उद्योग,पर्यटन तथा यातायात व्यवस्था मन्त्री जानकीप्रसाद यादव, कृषि तथा भूमि व्यवस्था मन्त्री तुलसीराम शर्मा र सामाजिक विकास मन्त्री चन्द्रकेश गुप्ताले पद तथा गोपनियताको शपथ लिएका हुन् ।

महरा र इन्द्रजित माओवादी केन्द्रबाट मन्त्री बनेका हुन् भने पन्थी, दुर्गाप्रसाद र शर्मा एमालेबाट बनेका हुन् । मन्त्री यादव राप्रपाका र गुप्ता जनमत पार्टीका हुन् ।

यो प्रदेशमा जसपा, नागरिक उन्मुक्ति पार्टी र लोकतान्त्रिक समाजवादी पार्टी भने तत्काल सरकारमा नजाने भएका छन् । उनीहरुले गिरी नेतृत्वको सरकारलाई भने समर्थन गरेका छन् ।