चालु आवमा ८ प्रतिशत आर्थिक वृद्धिदर हासिल नहुने, नयाँ कार्यक्रम र योजना नल्याइने

२९ माघ, काठमाडौं । चालु आर्थिक वर्षमा अनुमान गरिएको ८ प्रतिशत आर्थिक वृद्धि दर हासिल नहुने सरकारले निक्ष्कर्ष निकालेको छ ।

उपप्रधानमन्त्री तथा अर्थमन्त्री विष्णु पौडेलले आइतबार प्रतिनिधिसभामा सम्बोधन गर्दैै पुस मसान्त सम्मको आर्थिक परिसूचकको विश्लेषणले यस्तो अवस्था देखिएको बताए ।

साथै उनले सरकारी खर्च कटौती गर्नुपर्ने अवस्था आएकाले चालु आर्थिक वर्षमा थप दायित्व सिर्जना हुने कुनैपनि नयाँ कार्यक्रम र योजना पनि नल्याउने बताए ।

उनले हालसम्म मापदण्ड, कार्यविधि निर्देशिका र सञ्चालन विधि स्वीकृत नभएका कार्यक्रम पूर्ण वा आंशिक रुपमा स्थगित गर्ने पनि अर्थमन्त्रीले बताए ।

अर्थ मन्त्रालयबाट स्रोतको सहमति लिएका तर कार्यान्वयनमा जान बाँकी रहेका आयोजनाहरुको पुनः प्राथमिकीकरण गर्ने र त्यस्ता आयोजना कार्यान्वयनमा लैजानुपूर्व सम्बन्धित मन्त्रालयले पुनः अर्थ मन्त्रालयको सहमति लिनुपर्ने मन्त्री पौडेलले बताए ।

विषयगत मन्त्रालयहरुले आफ्नो बजेट र कार्यक्रमको प्राथमिकता निर्धारण गरी स्रोतलाई आन्तरिक रुपमै समायोजन गर्नुपर्ने नीति लिएकाे जानकारी दिए ।

खर्च हुन नसक्ने बजेट आर्थिक कार्यविधि तथा वित्तीय उत्तरदायित्व ऐन २०७६ बमोजिम अर्थ मन्त्रालयमा फिर्ता गर्नुपर्ने उनले बताए ।