कूल वस्तु निर्यात ३२ प्रतिशतले कमी, राेजगारका लागि जाने संख्यामा अधिक वृद्धि

२९ माघ, काठमाडौं । अर्थमन्त्री विष्णु पौडेलेले आइतबार प्रतिनिधिसभा बैठकमा आर्थिक वर्ष २०७९/८० को बजेटको अर्धवार्षिक समीक्षा प्रतिवेदन प्रस्तुत गरेका छन् । प्रतिवेदनमा राष्ट्रिय अर्थतन्त्रको बुँदागत विश्लेषण गरिएको छ ।

उनले आफूले मुलुकमा राजश्व संकलन अवस्था निकै कमजोर भइरहेको अवस्थामा मन्त्रालयको जिम्मेवारी सम्हालेको भन्दै त्यसलाई सुधार्ने कोशिस गरिरहेको बताए । वस्तू निर्यातको अवस्थामा निकै कमीको तथ्यांक पेश गरे ।

प्रतिवेदनमा आर्थिक वर्ष २०७९/८० को ६ महिनासम्म कुल वस्तु निर्यात अघिल्लो वर्षको सोही अवधिको तुलनामा ३२ प्रतिशतले कमी आई रू. ८० अर्ब ८१ करोड पुगेको छ । गत आर्थिक वर्षको सोही अवधिमा यस्तो निर्यात ९५.५ प्रतिशतले वृद्धि भएको थियो ।

समीक्षा अवधिमा जिंक सिट, पार्टिकल बोर्ड, अलैंची, ऊनी गलैंचा, पोलिष्टर धागो लगायतका वस्तुको निर्यात बढेको जनाइएको छ । अन्य वस्तु निर्यातमा कमी आएपछि आयात प्रतिशत बढेकाे उनकाे दाबी छ ।

समीक्षा अवधिमा कुल वस्तु आयात २०.७ प्रतिशतले कमी आई रू. ७ खर्ब ९२ अर्ब ६७ करोड कायम भएको छ। गत आर्थिक वर्षको सोही अवधिमा कुल वस्तु आयात ५१।१ प्रतिशतले बढेको थियो। समीक्षा अवधिमा पेट्रोलियम पदार्थ, स्पोन्ज आइरन, रासायनिक मल, सुन र अन्य स्टेशनरी सामान लगायतका वस्तुको आयात बढेको छ ।

समीक्षा अवधिमा कुल वस्तु व्यापार घाटा १९.२ प्रतिशतले कमी आई रू. ७ खर्ब ११ अर्ब ८६ करोड कायम भएको जनाइएको छ । अघिल्लो वर्षको सोही अवधिमा यस्तो घाटा ४६.६ प्रतिशतले बढेको थियो ।

यस्तै, चालु आवको छ महिनासम्ममा विप्रेषण आप्रवाह (नेपाली मुद्रामा) २४.३ प्रतिशतले वृद्धि भई रू. ५ खर्ब ८५ अर्ब ८ करोड पुगेको उल्लेख छ । अघिल्लो वर्षको सोही अवधिमा विप्रेषण आप्रवाह ५.७ प्रतिशतले घटेको थियो ।

वैदेशिक रोजगारीका लागि अन्तिम श्रम स्वीकृति लिने संस्थागत तथा व्यक्तिगत गरी नेपालीको सङ्ख्या ६४.६ प्रतिशतले वृद्धि भई २ लाख ७५ हजार ६ सय ४३ र पुनः श्रम स्वीकृति लिने नेपालीको सङ्ख्या समीक्षा अवधिमा ९.५ प्रतिशतले वृद्धि भई १ लाख ४२ हजार ५ सय ४८ पुगेको उल्लेख छ । उनले समीक्षा अवधिमा शोधनान्तर स्थिति रू. ९७ अर्ब १० करोडले बचतमा रहेको जनाएका छन् ।