राष्ट्र बैंकले भन्यो, ‘बिदा भएपनि अत्यावश्यक बैकिङ सेवा नरोक्नू’

१ फागुन, काठमाडौं । नेपाल राष्ट्र बैंकले सरकारले जनयुद्ध दिवसका अवसरमा बिदा दिएपनि बैंक तथा वित्तीय संस्थालाई अत्यावश्यक सेवा नरोक्न निर्देशन दिएको छ । राष्ट्र बैंकले एक सूचना जारी गर्दै आज सोमबार सार्वजनिक बिदा भएपनि अत्यावश्यक बैंकिङ सेवा नरोक्न बैंक तथा वित्तीय संस्थालाई निर्देशन दिएको हो । जनयुद्ध दिवसमा बिदा दिएको भन्दै निजी क्षेत्रका संघसस्थाहरुले पनि विरोध गरिरहेका छन् ।

यसअघि सार्वजनिक बिदामा बैंक तथा वित्तीय संस्था बन्द रहदै आएका थिए । तर, राष्ट्र बैंकले सोमबार अत्यावश्यक बैंकिङ सेवा भने नरोक्न निर्देशन दिएको छ । ‘नगद कारोबार, चेक क्लियरिङ, आरटीजीएसलगायत अत्यावश्यक बैंकिङ सेवा प्रदान गर्न बिहान १० बजेदेखि अपराहृन १ः३० बजेसम्म बैंक तथा वित्तीय संस्थाका आवश्यक विभाग तथा कार्यालय खुला राखी सेवा सुचारु गर्ने व्यवस्था मिलाउनु पर्नेछ,’ राष्ट्र बैंकको सुचनामा भनिएको छ ।

त्यस बाहेकका अन्य बैंकिङ सेवा भने बन्द रहनेछ । सरकारले सोमबार सार्वजनिक बिदा दिएको छ । यता, शेयर बजार भने सोमबार बन्द हुने भएको छ । सरकारले सार्वजनिक बिदा दिएको हुँदा नेप्से बन्द हुने भएको हो । आइतबार नेप्से सूचक ६०.८८ विन्दुले घटेर २१२१.७५ विन्दुमा अडिएको छ । बजार मंगलबार बिहान ११ बजे मात्र खुल्नेछ ।