बसको ठक्करबाट महिलाको मृत्यु घटनालाई लिएर वीरेन्द्रनगरमा पीडित र यातायात व्यवसायीबीच झडप

१ फागुन, सुर्खेत । वीरेन्द्रनगर बजारमा आज बिहान बसको ठक्करबाट एक महिलाको मृत्यु भएपछि स्थानीय आफन्त आन्दोलनमा उत्रिएका छन् । मृतकका आफन्त र स्थानीय बस चालकलाई कडा कारबाही र उचित क्षतिपूर्तिको माग गर्दै प्रदेश राजधानी वीरेन्द्रनगरमा आन्दोलनमा उत्रिएका छन् । उनीहरुले बिहानैदेखि वीरेन्द्रनगर बजार बन्द गराएका छन् ।

बसको ठकरबाट आइतबार दिउँसो वीरेन्द्रनगर बसपार्कमा बा४ख ८०६१ नम्बरको बसले जेब्राक्रसमा बाटो काट्दै गर्दा दिएको ठक्करबाट जाजरकोटको छेडागाड–६ की ६६ वर्षीय नदी रावतको मृत्यु भएको थियो । रावत हाल वीरेन्द्रनगर–१० को बामेखोलामा बस्दै आएकी थिइन् ।

आन्दोलनकारीले वीरेन्द्रनगरका मुख्य चोकहरू यरिचोक, मंगलगढी चोक, एयरपोर्ट चोक र बसपार्कमा टायर बालेर सडकअवरुद्ध गरेका छन् । सवारी साधनमाथि तोडफोडको प्रयास गरेपनि सुरक्षाकर्मीले रोकेका छन् ।

बजारका ठाउँठाउँमा आन्दोलनकारी र प्रहरी बीच झडप भएको छ । आन्दोलनकारी र यातायात व्यवसायीहरुबीच झडपको अवस्था देखिएपछि थप तनावको अवस्था उत्पन्न एको हो । झडपका क्रममा पत्रकारसहित केही व्यक्ति घाइते भएका छन् । वीरेन्द्रनगरमा छिटपुट मोटरसाइकल बाहेकका अन्य सवारी साधनहरू चल्न सकेका छैनन् ।

ठक्करबाट घाइते उनलाई उद्धार गरी प्रदेश अस्पताल पुर्याउँदा अस्पतालले उनलाई मृत घोषणा गरेको थियो ।
घटनापछि आफन्तहरूले आइतबार राति १० बजेसम्म बसपार्क, मंगलगढी चोकलगायतका ठाउँमा टायर बालेर आन्दोलन गरेका थिए ।

आफन्तलाई नसोधेर शव उठाइएको र बस चालकलाई पक्राउ नगरिएको भन्दै उनीहरू आक्रोशित बनेका छन् । सोमबार बिहानैदेखि पुनः आन्दोलनमा उत्रिएका छन् ।