सुदुरपश्चिमका मुख्यमन्त्री शाहले भेटे रेशम चौधरी

२९ माघ, काठमाडौं । सुदूरपश्चिम प्रदेशका नवनियुक्त मुख्यमन्त्री कमलबहादुर शाहले काठमाडौंमा राजनीतिक सक्रियता र भेटघाटलाई तीव्रता दिएका छन् ।

आइतबार पार्टी सभापति शेरबहादुर देउवासँग भेट गरेका उनले आइतबार नै डिल्लीबजारस्थित दरखोर जेलमा पुगेर नागरिक उन्मुक्ति पार्टीका संरक्षक रेशम चौधरीसँग भेट गरेका छन् । भेटबारे उनले सावर्जनिक गरेका छैनन् ।

शनिबार काठमाडौं आउनपहिले कैलालीमा नागरिक उन्मुक्ति पार्टीकी अध्यक्ष एवं संघीय सांसद रञ्जिता श्रेष्ठ चौधरीसँग घरेमै पुगेर भेट गरेका थिए । नियुक्त भएको ३० दिनभित्र प्रदेशसभा बैठकबाट विश्वासको मत लिइसक्नुपर्ने संवैधानिक व्यवस्था शाहलाई पनि अाइपरेकाे छ ।

सोही व्यवस्था पार गर्न नसक्दा पुष २७ मा नियुक्त मुख्यमन्त्री नियुक्त भएका एमालेका राजेन्द्र सिंह रावल माघ २६ मा पदमुक्त भएका थिए । सोही घटना दोहोरिन नदिने शाह राजनीतिक भेटवार्तामा लागिपरेका हुन् । भेटमा देउवाबाट शाहले विश्वासकाे मत जुटाउन पहल गरिदिने अश्वासन पाएका थिए ।

सुदूरपश्चिममा एमाले नेतृत्वको सरकार ढल्दै गर्दा आफ्ना प्रदेश सांसदलाई काठमाडौंमा राखेर बसिरहेका बेला रञ्जिताले रेशमसँग राजनीतिक छलफलका लागि पटकपटक भेट गरेकी थिइन् । रेशमकै सल्लाहबमोजिम उनले सबै जना प्रदेश सांसदलाई पुष २६ गतेका दिन काठमाडौंमा सँगै राखेर कहीँ कतै जान दिएनन् । र, सुदूरपश्चिम प्रदेश सरकार ढल्न पुग्यो ।

त्यसपछि माघ २७ मा प्रदेशसभाकाे सबैभन्दा ठूलाेकाे हैसियतले कांग्रेसबाट शाह मुख्यमन्त्री नियुक्त भएका थिए । शाहले रञ्जिताकै सल्लाहमा काठमाडौंमा आएर जेलमै पुगेर रेशमसँग भेट गरेको स्रोतको भनाइ छ ।

नागरिक उन्मुक्तिले विश्वासको मत दिएको खण्डमा मात्र उनको पद जोगिने संभावना छ । किनकि एमाले र माओवादी केन्द्रले मत नदिने बताइसकेका छन् । मुख्यमन्त्री पद जोगाउन उनलाई २७ जना प्रदेश सदस्यको मत आवश्यक पर्दछ । अहिले उनको पक्षमा खुलेको मत संख्या २४ मात्र छन् ।

यदि उनको पद पनि जोगिएन भने प्रदेशसभा सदस्यमध्येबाट एक जनाले आफूले विश्वासको मत लिन सक्ने आधार देखाएमा उनैलाई अन्तिमपटक मुख्यमन्त्री बनाइनेछ । उनले पनि ३० दिनभित्र विश्वासको मत पाउन नसकेको खण्डमा उनकै सिफारिसमा प्रदेशमा मध्यवधि चुनाव हुने संवैधानिक व्यवस्था छ ।

तर कुनैपनि मुख्यमन्त्रीले विश्वासको मत पाएको खण्डमा उनीविरुद्ध २ वर्षसम्म अविश्वासको मत दर्ता नहुने व्यवस्था छ ।