विद्युत् प्राधिकरणमा मिटर रिडरले सुरु गरे आमरण अनसन

१ फागुन, काठमाडौं । ज्यालादारी कायम गराउन माग राखदै नेपाल विद्युत् प्राधिकरणका मिटर रिडरहरूले प्राधिकरण परिसरमै आमरण अनसन सुरु गरेका छन् । विभिन्न माग राखेर आन्दोलनमा उत्रिएको मिटर रिडर संघर्ष समितिले सोमबारदेखि आमरण अनसन सुरु गरेको हो । अनसनमा बसेकाहरुले ज्यालादारी वृद्धि हुनुपर्ने, गोटा पद्दती खारेज गरी दैनिक ज्यालादारी बनाउनुपर्ने लगायत माग प्राधिकरण प्रशासनसँग राखेका छन् ।

हाल देशभर रहेका ६२३ जना यस्ता रिडरहरु रहेको उनीहरुले बताएका छन् । अहिले सम्म गोटा गन्तीका हिसावमा काम गरिहेका मिटर रिडरलाई ज्यालादारीका रुपमा राख्नुपर्ने उनीहरुको माग छ । हाल रिड गरेको मिटरको संख्याअनुसार उनीहरुले ज्याला पाउने गरेका थिए । यो नीति हटाएर दैनिक ज्यालादारीका रुपमा कायम गराउनुपर्ने उनीहरुको माग छ । यसअघि आफ्ना मागबारे ध्यानाकर्षण पत्र बुझाए पनि प्राधिकरणले कुनै सुनुवाई नगरेको भन्दै उनीहरुले आमरण अनुसन सुरु गरेका हुन् ।

मिटर रिडर संघर्ष समितिका एक सदस्यले अरु कुनै उपाए नलागेपछि अन्तिम विकल्पका रुपमा आमरण अनुसन सुरु गरेको बताए । उनले यो आफुहरुको रहर नभएर बाध्यता भएको र प्राधिकरण आफुहरुमाथि विभेदपूर्ण काम गरेको बताए । गोटाबाट ज्यालादारी व्यवस्थापन गर्दा आजीवन बर्खास्त नगर्ने ग्यारेन्टी गर्नुपर्ने, मिटर रिडरको संख्या किटानी गर्नुपर्ने, सार्वजनिक बिदा बाहेक एक वर्षमा १२ दिनसम्म भैपरी र ६० दिन सुत्केरी बिदा दिनुपर्ने उनीहरुक माग छन् ।

प्राधिकरणको कामको सिलसिलामा दुर्घटनामा परेमा उपचार खर्चको व्यवस्था गर्न, प्राधिकरणको निर्माणाधीन आयोजनाको सेयर मिटर रिडरहरूलाई पनि अन्यसरह व्यवस्था गर्नुपर्ने माग पनि राखेका छन् । उनहिरुको आमरण अनसनबारे प्रधिकरण प्रशासनले भने कुनै प्रतिक्रिया दिएको छैन । उनीहरु आमरण अनसनमा बसेपछि मिटर रिडरको काम पनि पुर्ण रुपले प्रभावित भएको छ ।