लघुवित्तका ऋणी धमाधम ज्यान फाल्ने बाटाेमा, कञ्चनरुपकी शान्ताले गरिन् झुण्डिएर आत्महत्या

२ फागुन, काठमाडौं । लघुवित्तको ऋणको मार थेग्न नसक्दा सप्तरीमा एक जना महिलाले आत्महत्या गरेका छन् । सप्तरीको कञ्चनरुप नगरपालिका–९ विष्णुमन्दिर टोलकी ५८ वर्षीया शान्ताकुमारी भुजेलले साेमबार घरनजिकैका रूखमा पासो लगाइ झुण्डिएर आत्महत्या गरेकी हुन् ।

उनको शवको पोस्टमार्टम गरी मृतक परिवारलाई जिम्मा लगाइएको छ । घटनाको विषयमा थप अनुसन्धान भइरहेको सप्तरीका प्रहरी नायव उपरीक्षक नरेश सिंहले जानकारी दिए ।

शान्ताले विभिन्न लघुवित्त र साहुमहाजनबाट लिएको ऋण तिर्न नसकेपछि दिनदिनैको अभाव र तनाव खेप्न नसकेका कारण मृत्युको बाटो रोजेकी स्थानीय बताउँछन् । ऋण उठाउन लघुवित्त र साहुहरुले चरम तनाव दिन नछाडेपछि उनी मानसिक रुपमा विक्षिप्त भएकी उनीहरुको भनाइ छ ।

उनले परिवारको सम्पतिको नाममा रहेको १० धुर घरघडेरी पनि एक वर्षअघि एकजना साहुको नाममा पास गरी ऋण लिएका थिए । घटनास्थलबाट फर्किएकी कञ्चनरुप नगरपालिकाकी उपप्रमुख मुना कुमारी पोखरेलले ऋणकै कारण तनावमा आएर शान्ताले आत्महत्या गरेको स्थानीयले बताएको जानकारी दिइन् ।

केही दिन अगाडि उनका श्रीमान् भीमबहादुर उपप्रमुख पोखरेलकै घरमा पुगेर लघुवित्त र साहुमहाजनले आफूलाई ऋण तिर्न दबाब दिइरहेको तर पैसा नभएको कुरा सुनाएको उपप्रमुख पोखरेलले बताइन् ।

दुई वर्ष अगाडिसम्म भुजेल परिवार उपप्रमुख पोखरेलकै घरमा ज्याला मजदुरीमा काम गर्दै आएका थिए । दुई दाजु–भाइ छन् । भुजेल पविारलाई अनुमानित२५ लाख जति ऋण भएको खुलेको उपप्रमुख पोखरेलले बताइन् ।

लघुवित्तका कर्मचारीले गत असारमा भुजेलको घरमै पुगेर सबै सामान उठाएका थिए । त्यसबेलादेखि झनै तनाव परेकी थिइन् । इन्फिनिटी लघुवित्त वित्तिय संस्था लिमिटेडको महुली शाखा, स्वावलम्बन लघुवित्त विकास बैंकको महुली शाखाबाट उनले ऋण लिएको बताइएको छ ।

मृतकका २ छोरी र एक छोरा छन् । दुई छोरीको बिहे भइसकेको छ भने छोरा वैदेशिक रोजगारमा छन् । बुहारी माइत बस्दै आएकी उनीहरुको घरमा श्रीमान श्रमिती बस्दै आएका थिए ।

गत पुस १० मा सप्तरीकै छिन्नमस्ता गउँपालिका–२ रामपुरका ४५ वर्षीय रामदेव मरिकले ऋण तिर्न नसकेर आत्महत्या गरेका थिए । उता रुपन्देहीको देवदह नगपालिकाको धकधैया नजिकै ६ नम्बर चोककी बिना लामाले पनि गत वर्ष चैत १ गते दिउँसो लघुवित्त र बैंकको ऋणको तनावकै कारण घरभित्र झुण्डिएर आत्महत्या गरेकी थिइन् । वडा कार्यालयले नै ऋण तिर्न दबाबमूलक व्यवहार देखाएपछि उनले आत्हत्याको बाटो रोजेकी छिमेकीहरु बताउँछन् ।

उनका २ छोरी र एक छोरा छन् । उनीहरु सबै विद्यालय तहमा अध्ययनरत छन् । उनका श्रीमान श्याम अहिले बलात्कार कसुरमा जेलमा रहेको बताइएको छ ।