जसपाले चुनावी अन्तर्घातबारे छानबिन गर्न बढायो म्याद

२ फागुन, काठमाडौं । गत मंसिरमा सम्पन्न चुनावमा पार्टीभित्र भएको अन्तर्घातबारे छानबिनका लागि उपेन्द्र यादव नेतृत्वकाे जनता समाजवादी पार्टी (जसपा) नेपालले म्याद थपेको छ । छानबिन गरी कार्यदलले माघ मसान्तभित्र प्रतिवेदन बुझाउनुपर्नेमा छानबिनको काम पूरा गर्न नसकेपछि यही फागुन १५ गतेसम्मका लागि म्याद थप गरेको हो ।

जसपाले चुनावमा भएको अन्तर्घातबारे छानबिन गर्न कार्यकारिणी सदस्य शिवलाल थापाको संयोजकत्वमा कार्यदल गठन गरेको छ । कार्यदलले विभिन्न १५ वटा जिल्लामा छानबिन गर्ने भनेर सूची तयार गरेको छ । सोही अनुसार छानबिन सुरु गरिएको कार्यदलका संयोजक थापाले बताए ।

१५ वटा जिल्लामध्ये मोरङ, सप्तरी, सिरहा, धनुषा, महोत्तरी, सर्लाही, बर्दिया, सुर्खेत, कैलाली, मकवानपुर, धादिङमा छानबिन गरी बयान लिइसकेको छ । संयोजक थापाले भने, ‘मकवानपुर र धादिङमा बयान लिन बाँकी छ एकपटक त्यहाँ पुनः जानुपर्ने हुन्छ । सुनसरी र पाँचथर गएर छानबिन गर्नै बाँकी छ ।’

कुन कुन क्षेत्रमा कसरी अन्तर्घात भएको, ककसले गरेको भन्दै जसपाले प्रमाणसहित उजुरी दिन पार्टीलाई सर्कुलर गरेको थियो । सोही अनुसार जिल्ला जिल्लाबाट केन्द्रमा उजुरी आएको हो । त्यसमध्ये सबभन्दा बढी सप्तरी क्षेत्र नम्बर २ बाट ३८ जनाको नाम केन्द्रमा आएको हो । जसपाका अध्यक्ष उपेन्द्र यादव सो क्षेत्रबाट चुनाव हारेका हुन् ।

केन्द्रमा ना पठाइएका ती ३८ जनाबाट बयान लिने काम पनि सकिएको छ । बयान लिने क्रममा ती नेताहरूले केही थपा नेताको नाम पोलेका छन् ।