सरकारी वकिल कार्यालयले रविको राहदानीसम्बधी जाहेरीमा प्रहरीकाे प्रतिवेदन कुर्ने

३ फागुन, काठमाडौं । सरकारी वकिलको कार्यालय राहदानी दुरुपयोग आरोपमा राष्ट्रिय स्वतन्त्र पार्टीका सभापति रबि लामिछानेविरुद्ध परेको जाहेरी दरखास्त दर्ता गर्न नपर्ने निर्णय गरेको छ ।

लामिछानेले झुटो विवरण दिएर नेपाली र अमेरिकी राहदानी लिएको भन्दै सिन्धुलीका सफल भनिने युवराज पौडेलले जिल्ला सरकारी वकिलको कार्यालय काठमाडौंमा जाहेरी दिएका थिए ।

जाहेरीमाथि कारबाही गर्ने क्रममा कार्यालयले जाहेरीसँग सम्बन्धित निकायबाट कागजात मगाएर अध्ययन सुरु समेत गरिसकेको अवस्थामा यस्तो निर्णय गरेको हो ।

यसअघि सोही विषयमा पौडेलले प्रहरी परिसर काठमाडौंमा जाहेरी दर्ता गराउन खोज्दा प्रहरीले सर्वोच्च अदालतको विषय भएको जनाउँदै दर्ता गरेको थिए । तर, अहिले सो विषयमा अनुसन्धान भइरहेको जानकारी पाइएपछि कार्यालयले कार्यालयबाट जाहेरीमाथि कारबाही गरिराख्न नपर्ने जनाएको छ ।

सरकारी वकिल कार्यालयले पत्र काटेर यसअघि लामिछानेको राहदानीको विषयमा जिल्ला प्रशासन कार्यालय काठमाडौं, राहदानी विभाग र अध्यागमन विभागबाट सम्बन्धित कागजात मगाएको थियो । सो क्रममा जिल्ला प्रशासन कार्यालयले भने रविले नागरिकताको अभिलेख भेटिएको जवाफ पठाएको बताइएको छ ।

अब प्रहरीले नै अनुसन्धान सकेर सरकारी वकिल कार्यालयमा प्रतिवेदन पेस भएपछि मात्रै त्यसको अध्ययन गरी लामिछानेविरुद्ध मुद्दा चलाउन पर्ने नपर्ने निर्णय लिनेछ ।