सभामुखले अडान नछाडेपछि कांग्रेसले गर्याे मधेश प्रदेशसभा बैठक अवरुद्ध

३ फागुन जनकपुर । मधेश प्रदेशसभाको बैठकमा कांग्रेस सांसदहरूले अवरोध गरेका छन् । प्रदेशसभा परिसरमा आफूले बोलाएका अतिथिलाई प्रवेश दिनुपर्ने माग राख्दै प्रतिपक्षी दल कांग्रेसका सांसदहरूले बैठकमा अवरोध पुर्‍याएका हुन् ।

संसदीय दलको कार्यालयमा बोलाइएका पाहुनालाई गेटबाटै छिर्न नदिइएको भन्दै कांग्रेस सांसदले आजको बैठकमा अवरोध पुर्‍याएका छन् । कांग्रेसको अवरोधपछि सभामुख रामचन्द्र मण्डलले १० मिनेटका लागि बैठक स्थगित गरेका छन् ।

सभामुख मण्डलले प्रदेशसभा परिसरमा अराजकता सिर्जना गर्ने, बैठकलाई अवरोध पुर्‍याउने खालका व्यक्तिलाई प्रवेश गर्न दिन नसकिने बताएका थिए । मण्डलले अडान नछाडेपछि कांग्रेसका सांसदहरूले उठेर बैठक चलाउनबाट राेकेका थिए ।