प्रेम दिवसमा ३ करोड ४८ लाखको गुलाबको फूल बिक्री

३ फागुन, काठमाडौं । सरकारले प्रेम दिवसमा गुलाबको फूल आयातमा रोक लगाएपनि सहजै भित्रिएको छ । १४ फेब्रुअरी अर्थात फागुन २ गते मनाइने प्रेम दिवसमा यस वर्ष ३ करोड ४८ लाखको गुलाबको फूल बिक्री भएको छ । प्रणय दिवसको साताभर ३ लाख ४८ हजार स्टिक गुलाब फूल खपत भएको फ्लोरिकल्चर एसोसिएसनले जनाएको हो ।

एसोसिएसनका अनुसार पोहोरको प्रणय दिवसको तुलनामा यो वर्ष ६८ प्रतिशत धेरै गुलाब खपत भएको छ । पोहोरको प्रणय दिवसमा एक सातामा २ लाख ७ हजार स्टिक गुलाब खपत भएको थियो ।

यो बर्षको प्रेम दिवसमा काठमाडौं उपत्यकामा मात्रै ६० प्रतिशत गुलाब खपत भएको एसोसिएसनले जनाएको छ । प्लान्ट क्वोरेन्टिन तथा विषादी व्यवस्थापन केन्द्रले गुलाब फूल आयातमा रोक लगाए पनि बजारमा गुलाबको अभाव नखटिएको बताइएको छ ।

केन्द्रले गुलाब फूलको आयातका लागि अनुमति पत्रमा रोक लगाउँदा समेत सहजै गुलाब आयात भइरहेको बताइएको छ ।