शुक्लाफाँटामा सार्वजनिक शौचालय निर्माण हुने, सात लाख बजेट विनियोजन

४ फागुन, कञ्चनपुर । शुक्लाफाँटा नगरपालिकाले दुई ठाउँमा सार्वजनिक शौचालय निर्माण गर्ने भएको छ । पूर्व पश्चिम राजमार्ग क्षेत्रमा पर्ने वनसमिति बजार र झलारी बजारको खुला मञ्चमा शौचालय निर्माण हुन लागेको हो । खुला मञ्चमा निर्माण हुने शौचालयका लागि रु १६ लाख र वनसमिति बजारमा निर्माण हुने शौचालयका लागि रु सात लाख बजेट विनियोजन गरेको छ ।

यसका लागि जग्गा पहिचान गरी ठेक्का प्रक्रिया अगाडि बढाइएको नगर प्रमुख रणबहादुर महराले बताए ।“धेरै व्यक्तिको जमघट हुने सार्वजनिक क्षेत्रमा शौचालय निर्माण गर्न लागेका छौंँ” उनले भने, “यसबाट बजार क्षेत्रका बासिन्दासँगै सर्वसाधारण लाभान्वित हुनेछन् ।” शौचालय नहुँदा बजार क्षेत्रमा आउने सर्वसाधारणले वनसमिति बजार नजिकैको वन क्षेत्रमा शौच गर्दै आएका छन् ।

यसबाट बजार क्षेत्र दुर्गन्धित हुँदै आएको छ । यसैगरी, खुला मञ्चमा सार्वजनिक कार्यक्रम हुँदा दिसापिसाबका लागि सर्वसाधारणले नदी छेउ पुग्नुपर्ने अवस्था छ शौचालयमा सरसफाइ कर्मचारीको व्यवस्था गरिने भएको छ । पुराना सञ्चलनमा रहेका शौचालयलाई व्यवस्थित गर्ने कार्यसँगै मर्मतको कार्य पनि अगाडि बढाइने नगरपालिकाका प्रमुख प्रशासयिक अधिकृत टिकेन्द्रराज भट्टले बताए ।

उनका अनुसार नगरपालिकाका मुख्य बजार क्षेत्र वनसमिति, झलारी र कलुवापुरमा फोहर सङ्कलन बक्स राखिने भएका छन् । यसका लागि नगरपालिकाले रु पाँच लाख बजेटको व्यवस्था गरेको छ । झलारीस्थित खुला मञ्चमा प्यारफिट निर्माणका लागि रु २५ लाख बजेट विनियोजन गरिएको नगर प्रमुख महराले जानकारी दिए ।“छिट्टै प्याराफिट निर्माणसँगै फोहर सङ्कलन बक्स राख्नका लागि कार्य अगाडि बढाउँदै छौँं” उनले भने, “बसपार्क निर्माणका लागि रु पाँच लाख, कवर्ड हल निर्माणका लागि रु ५० लाख, कोल्डस्टोर निर्माणका लागि रु २५ लाख, वृद्धाश्रम निर्माणका लागि रु १० लाख बजेट विनियोजन गरी जग्गा खोजी भइरहेको छ ।”