बचतकर्ताको रकम हिनामिनाको आरोपमा सहकारीका संचालक पक्राउ

४ फागुन, मोरङ । विराटनगरको तुलसी बहुमुखी सहकारीका दुई जना संचालकलाई प्रहरीले पक्राउ गरेको छ । बचतकर्ताको रकम हिनामिना गरेको आरोपमा उपाध्यक्ष अनिता गौतम र सचिव सविना न्यौपानेलाई पक्राउ गरेको हो ।

बचत रकम फिर्ता नपाएपछि बचतकर्ताहरुले आन्दोलन गर्दै आएका थिए । उनीहरुले प्रहरीमा उजुरी समेत दिएका थिए । उजुरीका आधारमा उनीहरुलाई पक्राउ गरिएको हो ।

बचत गरेको रकम दिनुपर्ने माग राख्दै तुलसी सहकारीका सदस्यहरूले बचत गरेको रकम साँवा र ब्यासहित दिनुपर्ने माग राख्दै सहकारी सञ्चालक र अध्यक्षको घर समेत घेरेका थिए ।

उनीहरूलाई अभद्र व्यवहार कसुरमा अनुसन्धान गर्न जिल्ला अदालतबाट म्याद थप गरेर अनुसन्धान सुरु गरिएको छ । सहकारीका अध्यक्ष केदारनाथ शर्मा भने फरार छन् ।

विराटनगरकी ४ की बिमला भट्टराईले मुद्दती खातामा १८ लाख जम्मा गरेको वर्ष दिन पूरा भइसक्दा पनि सहकारीले साँवा र ब्याज रकम पाउन नसकेको बताइन् ।

विराटनगरकै ममता कुमारी साहले पनि सहकारीमा बचत गरेको १८ लाख रुपैयाँ पाउन सकेकी छैनन् । सहकारीले भने विश्वव्यापी रूपमा भइरहेको आर्थिक मन्दीको प्रभाव सहकारीमा परेको भन्दै रकम फिर्ता दिन नसकिने सूचना टाँस गरेको छ ।