मुख्यमन्त्री शाहसँग पनि नागरिक उन्मुक्ति पार्टी सशंकित

५ फागुन, काठमाडौं । सुदूरपश्चिम प्रदेशकामुख्यमन्त्री कमलबहादुर शाहलाई पनि विश्वासको मत पाउन मुश्किल पर्ने देखिएको छ । विश्वासको मतमा निर्णायक मानिएको नागरिक उन्मुक्ति पार्टीले मुख्यमन्त्री शाहलाई विश्वास गर्न नसकिने बताइसकेको छ । उसले उठाउँदै आइरहेको मागबारे शाहले कुनै चासो देखाएको र फगत विश्वासको मत पाउन अभ्यास गरिरहेको जनाएको छ ।

शाहले विश्वासको मतका लागि नागरिक उन्मुक्तिका अध्यक्ष, प्रदेशको संसदीय दलका नेतासँग पटकपटक भेट गरेर मत मागेका छन् । तर उनीहरुले वचन दिएका छैनन् । माग पूरा गर्नेबारे लिखित सम्झौता हुनुपर्ने अडान पार्टीले लिएको छ । पछिल्लो चरणमा शाहको दौडधुपले नागरिक उन्मुक्ति सशंकित बनेको छ ।

त्यसपछि शाहले ११ मत रहेको माओवादी केन्द्रसँग नजिकिने प्रयास थालेका छन् । तर माओवादी केन्द्रले विश्वासको मत दिन नसकिने स्पष्ट रुपमा बताउँदै आएको छ ।

माओवादी, नागरिक उन्मुक्तिकै समर्थनमा मुख्यमन्त्री बनेका एमाले राजेन्द्रसिंह रावल नागरिक उन्मुक्तिले माग पूरा नगरेको भन्दै विश्वासको मत नदिएकै कारण महिना दिनमै पदच्यूत हुन पुगेका थिए ।

रावलले माघ २६ मा प्रदेशसभा बैठकमा विश्वासको मत लिन प्रस्ताव पेश गर्ने क्रममा प्रदेशको विकास र समृद्धि अनि आफूले गर्न सक्ने कामबारे बैठकमा निकै चर्चा गरे । उनको बैठक सम्बोधन भाषा धेरै मात्रामा अंग्रेजी प्रयोग गरे । निकै फुर्तिसाथ प्रदेश विकासको गुरुयोजना सुनाए । तैपनि नागरिक उन्मुक्तिले विश्वास गरेन । उनको पद जोगिएन ।

त्यसपछि शाह संविधानमा व्यवस्था भएबमोजिम प्रदेशसभाको सबैभन्दा ठूलो दल भएकै कारण पुष २६ गते मुख्यमन्त्री बनेका हुन् । उनले फागुन १६ गतेभित्र विश्वासको मत लिनुपर्ने बाध्यकारी अवस्था छ । नागरिक उन्मुक्ति जेलमा रहेका पार्टीका संरक्षक रेशम चौधरीको इसाराबिना एक् इञ्च दायाँबायाँ नहुने अवस्थामा रहेको छ । रेशमलाई आफूलाई जेलमुक्त गर्नुपर्ने विषयलाई पहिलो नम्बर माग राखेका छन् ।

शाहका पार्टी कांग्रेससँग १९, एकीकृत समाजवादीसँग ४, सवतन्त्र १ मत रहेको छ । विश्वासको मत पाउन अर्थात मुख्यमन्त्रीमा बहुमतका लागि २७ मत आवश्यक पर्छ ।