द्रव्य शाह क्याम्पस प्रमुखमाथि कुटपिट गर्नेलाई कारबाहीको माग गर्दै तालाबन्दी

५ फागुन, गोरखा । द्रव्य शाह बहुमुखी क्याम्पसका प्रमुख रामचन्द्र दुवाडीमाथि कुटपिट गर्नेलाई कारबाही नगरेको भन्दै एमालेनिकट स्वतन्त्र विद्यार्थी युनियनले क्याम्पसमा तालाबन्दी गरेकाे छ ।

दोषीमाथि कारबाहीको माग गर्दै उजुरी दिएपनि प्रहरी संगठन र प्रशासनले विभिन्न बहानाबाजीमा घटनालाई राजनीतिकरण गरी दोषीलाई उन्मुक्ति दिन खोजको आरोप लगाउँदै क्याम्पसको इकाइ स्ववियूले आज तालाबन्दी गरेको हो ।

प्रेस बिज्ञप्ती जारी गर्दै स्ववियूले दोषीलाई कानूनी दायरामा नल्याएसम्म क्याम्पसको पठनपाठन एवं प्रशासनिक कामकाज बन्द रहने जनाएको छ ।

जनयुद्धको विरोध गर्दै सामाजिक सञ्जालमा अभिव्यक्ति पोष्ट गरेको भन्दै क्याम्पस प्रमुख दुवाडीमाथि माओवादी केन्द्र निकट विद्यार्थी संगठन अनेरास्ववियू (क्रान्तिकारी) क्याम्पस इकाइका विद्यार्थीहरुले यही फागुन २ गते कार्यकक्षमा प्रवेश गरेर कुटपिट गरेका हुन् ।

कुटपिटमा इकाइ अध्यक्ष अनिस अर्याल, राजन आले मगर, अनेरास्ववियू विष्णु पाण्डे, अमृत श्रेष्ठ, सुवास तामाङ लगायत युवाहरुको संलग्नता रहेको किटानी जाहेरी प्रहरीमा परेको छ ।