नेपाल फर्किएका यादव चरित्रहत्याको आरोपमा विमानस्थलबाट पक्राउ

५ फागुन, काठमाडौं । विदेशमा रहेका बेला नेपालमा रहेका महिलाको चरित्र हत्या गरेको आरोपमा नेपाल फर्किएका एक युवकलाई प्रहरीले त्रिभुवन अन्तर्राष्ट्रिय विमानस्थलबाट पक्राउ गरेको छ ।

मलेसियाबाट फर्किने क्रममा प्रहरीले रौतहटको देवाही गोनही नगरपालिका–५ स्थित टिकुलियाका २२ वर्षीय हरिहरप्रसाद यादव त्रिभुवन अन्तर्राष्ट्रिय विमानस्थलबाटै अभियुक्तलाई पक्राउ गरेको हो । पीडित महिलाको नाबालिका बहिनी समेतसँगै भएको तस्विर प्रयोग गरी यादवले सामाजिक सञ्जालमा चरित्रहत्या गरेको उजुरी नेपाल प्रहरीको साइबर ब्युरोमा परेको थियो ।

वैदेशिक रोजगारीमा रहेका उनले महिलाका परिवारलाई समेत मानसिक तनाव, हैरानी दिएको आरोप उजुरीमा छ । लामो समयदेखि निगरानीमा परेका यादवलाई नेपाल आए लगत्तै बिहीबार पक्राउ गरिएको हो ।

उनलाई पक्राउ गर्न प्रहरीले विद्युतीय कारोबार ऐन, २०६३ अन्तर्गतको कसुरमा जिल्ला अदालतबाट पक्राउ अनुमति लिएको थियो । पक्रापछि अदालतबाट ५ दिनको म्याद लिएर अनुसन्धान गरिरहेको प्रहरीले जनाएको छ ।