आईसिसी विश्वकप लिग-२ : स्कटल्याण्डमाथि नेपालको शानदार जित

५ फागुन, काठमाडौं । आईसिसी विश्वकप लिग–२ अन्तर्गत आजको खेलमा नेपालले स्कटल्यान्डलाई हराएर जित निकालेको छ । त्रिवि कीर्तिपुर क्रिकेट मैदान आज भएको खेलमा दीपेन्द्र सिंह ऐरी र कुशल मल्लको उत्कृष्ट ब्याटिङ मद्दतमा नेपालले स्कटल्याण्डलाई ३ विकेटले पराजित गरेको छ ।

टस जितेर सुरूमा ब्याटिङ राेजेकाे स्कटल्यान्डले दिएको २७५ रनको लक्ष्य नेपालले ७ विकेट गुमाएर ४७ ओभरमा पूरा गर्‍यो । नेपालको जितमा दिपेन्द्रसिंह ऐरी र कुशल मल्लले अर्धशतक प्रहार गरे।

कुशलले ८१ रनको योगदान गरे। उनले ६७ बलमा ९ चौका र ४ छक्का प्रहार गरे। कुशलले एकदिवसीय खेलमा दोस्रो अर्धशतक प्रहार गरेका हुन्। यसअघि उनले लिग-२ कै खेलमा अमेरिकाविरुद्ध अर्धशतक प्रहार गरेका थिए।

दिपेन्द्रसिंह ऐरीले नटआउट ८५ रन जोडे। उनले ११६ बलमा ८ चौका र १ छक्का हाने । कुशल र दिपेन्द्रबीच छैटौं विकेटका लागि सय रनको साझेदारी भएको थियो। यहि साझेदारी नेपालको जितको आधार बन्यो । विजयी चौका हिर्काएका सोमपाल कामीले नटआउट २४ रन जोडे । उनले ३२ बलमा ३ चौका प्रहार गरे ।

ओपनर कुशल भुर्तेल १६ रन बनाएर तेस्रो ओभरमा, ज्ञानेन्द्र मल्ल ४ रनमा सोही ओभरमा र आसिफ शेख पाँचौ ओभरमा ९ रन बनाएर आउट हुँदा नेपालले ५ ओभरमा तीन विकेट गुमायो । तीनै जनालाई स्कटल्यान्डका क्रिस सोलले क्याच आउट गरे। उनले पहिलो ओभरमा २३ रन खर्चिए पनि त्यसपछि उत्कृष्ट बलिङ गरेका थिए।

यस्तै नेपालका कप्तान रोहित पौडेल ६ रन तथा सन्दीप जोरा ५ रन जोडेर आउट भए । दुवैलाई स्कटल्यान्डका मार्क वाटले आउट गरे। गुल्शन झाले २८ बल खेलेर १७ रन जोडेका थिए । बलिङमा स्कटल्यान्डका क्रिस सोल र मार्क वाटले ३-३ विकेट लिए । अब नेपालले शृंखलाको तेस्रो खेलमा शनिबार नामिवियासँग प्रतिस्पर्धा गर्दैछ ।